ដោយបច្ចុប្បន្នពិភពលោកកំពុងស្ថិតក្នុងយុគសម័យបច្ចេកវិទ្យា ការរកប្រាក់ចំណូលមិនមែនអាចរកបានតែតាមរយៈការធ្វើការងារនៅកន្លែងធ្វើការមួយមុននោះទេ ប៉ុន្តែមនុស្សជុំវិញពិភពលោកអាចប្រើបច្ចេកវិទ្យាដើម្បីរកចំណូលបន្ថែមបានថែមទៀតផង។ ជាក់ស្ដែង ការប្រើប្រាស់ប្រព័ន្ធអ៊ីនធឺណិត មិនត្រឹមតែដើម្បីបង្កើនភាពងាយស្រួលក្នុងការទំនាក់ទំនងប៉ុណ្ណោះទេប៉ុន្តែអាចរកចំណូលបានថែមទៀតផង។
ការរកចំណូលតាមបណ្ដាញអ៊ីនធឺណិតនេះ មានសណ្ឋានខុសៗគ្នា ដោយអ្នកខ្លះគាត់អាចរកចំណូលតាមរយៈការយកតំណរភ្ជាប់នៃផលិតផលទីផ្សារអនឡាញៗធំៗដូចជា Amazon យកមកបង្ហោះលើគេហទំព័រ ឬប្លុករបស់ខ្លួន ដើម្បីស៊ីកម្រៃជើងសារ និងអ្នកខ្លះទៀតធ្វើជាភ្នាក់ងារផ្សព្វផ្សាយពាណិជ្ជកម្មឲ្យក្រុមហ៊ុនGoogle ដើម្បីទាញយកប្រាក់កម្រៃផងដែរ។
មែនទែនទៅ ការរកចំណូលដោយប្រើបច្ចេកវិទ្យាទំនើបបែបនេះ គឺមិនមែនមានតែពីរមុខនេះទេ គឺនៅមានវិធីសាស្ត្រជាច្រើនទៀត ប៉ុន្តែទោះជាយ៉ាងណា បច្ចុប្បន្នគេសង្កេតឃើញថា ការរកលុយតាមរយៈGoogle កំពុងមានសន្ទុះខ្លាំងជាងគេទាំងក្នុងប្រទេសកម្ពុជា និងក្នុងពិភពលោក។
ជាអ្នកបកប្រែភាសាអង់គ្លេសអាជីព លោក ម៉ៅ គង់ បានបង្កើតប្លុកមួយឈ្មោះwww.communityplan.blogspot.com ដែលប្លុកនោះ និយាយអំពី ការអប់រំផ្សេងមានទាំងអត្ថបទ និងមានទាំងវីដេអូដើម្បីផ្ដល់ចំណេះដឹងបន្ថែមដល់ប្រជាពលរដ្ឋ។ លោកបានយកតំណភ្ជាប់ (link) និង ផ្ទាំងរូបភាព (Banner) នៃផលិតផលពីទីផ្សារអនឡាញ Amazon មកបង្ហោះលើប្លុករបស់លោកដើម្បីដាក់លក់ និងទាញយកកម្រៃជើងសារ ហើយលោកក៏បានបំពេញតួនាទីជាភ្នាក់ងារផ្សព្វផ្សាយពាណិជ្ជកម្មឲ្យក្រុមហ៊ុន Google ផងដែរ។
លោកបន្តថា ចាប់តាំងពីពេលបង្កើតមកដល់បច្ចុប្បន្ន លោកអាចរកប្រាក់កម្រៃពីវាបានតិចតួច ដោយសារលោកខ្វះពេលដើម្បីពង្រីកលើការងារនេះ តែលោកថា ការរកចំណូលបន្ថែមតាមប្រព័ន្ធInternet ដែលលោករៀបរាប់មិនមែនជាការបោកប្រាស់នោះទេ។ លោកថា អ្នកបង្កើតប្លុក ឬគេហទំព័រទាំងនេះអាចនឹងរកប្រាក់ចំណូលបានច្រើនដែរ បើសិនជាផ្ដោតការយកចិត្តទុកដាក់ឱ្យខ្លាំង។
លោក ម៉ៅ គង់ រៀបរាប់បន្តទៀតថា ដើម្បីរកលុយតាម Internet តាមរយៈការយកការផ្សព្វផ្សាយទំនិញ Amazon ដើម្បីទទួលបានកម្រៃជើងសា គឺដំបូងលោកត្រូវបង្កើតវេបសាយ ឬប្លុកខ្លួនឯងមួយ បន្ទាប់មកត្រូវសុំសិទ្ធិទៅក្រុមហ៊ុន Amazon ដោយត្រូវបំពេញបែបបទកំណត់ដោយ Amazon។
ក្នុងបែបបទនោះលោកត្រូវរៀបរាប់ពីគោលដៅនៃគេហទំព័ររបស់លោកថា ផ្ដោតទៅលើអ្វី? ផ្តល់អត្ថប្រយោជន៍អ្វីខ្លះដល់អ្នកទស្សនា? បន្ទាប់មកទៀតលោកត្រូវរកចាំការការអនុញ្ញាតពីក្រុមហ៊ុនAmazon ដោយពេលវេលាអាចយូរគួរសមទម្រាំក្រុមហ៊ុន Amazon ពិនិត្យមើលសំណើរបស់លោករួចរាល់។
ទោះជាយ៉ាងណា លោកថា ការសុំសិទ្ធិនេះ កម្រនឹងទទួលបានការអនុញ្ញាតខ្លាំងណាស់ពីក្រុមហ៊ុន Amazon។
លោកក៏បានរៀបរាប់បន្តថា ក្រោយពីទទួលបានសិទ្ធិហើយ លោកអាចជ្រើសយកផលិតផលប្រភេទណាក៏បានដែលមាននៅក្នុងទីផ្សារ Amazon មកដាក់បង្ហោះនៅវេបសាយ ឬប្លុករបស់ខ្លួន ហើយនឹងទទួលបានប្រាក់កម្រៃជើងសាមកវិញ បើសិនផលិតផលណាមួយត្រូវបានបញ្ជាទិញ។
លោកថា ការធ្វើឲ្យអតិថិជន ឬអ្នកអានតាមប្រព័ន្ធអ៊ីនធឺណិតអាចបញ្ជាទិញផលិតផលឲ្យបានច្រើន វាគឺជារឿងលំបាកថ្មីមួយទៀតបន្ទាប់ពីការសុំសិទ្ធិដាក់លក់ ដោយចំណុចនេះ លោកថា ម្ចាស់ប្លុកត្រូវពង្រឹងនូវវេបសាយ ឬប្លុករបស់ខ្លួនឲ្យបានល្អ តាមរយៈការព្យាយាមរកអ្វីដែលថ្មីៗ ល្អៗ មកដាក់លើវេបសាយ ឬប្លុកនោះ ដើម្បីទាក់ទាញអ្នកមើល ឲ្យចូលមកមើលឱ្យបានច្រើន។
លោក ម៉ៅ គង់ បន្តថា ការងារនេះ គឺទាមទារមានពេលវេលាច្រើន និងមានភាពអត់ធ្ងន់ ព្យាយាមខ្ពស់ណាស់ ដើម្បីអាចទទួលបានផ្លែផ្កានៅពេលក្រោយ។
សូមបញ្ជាក់ថា លោកម៉ៅ គង់ បានបង្កើតប្លុកនេះអំឡុងឆ្នាំ ២០១៣ ក្រោយពីលោកបានយល់ដឹងពីការវិវត្តន៍នៃការរកប្រាក់ចំណូលបន្ថែមតាមរយៈ Internet នៅជុំវិញពិភពលោក ៕
0 comments:
Post a Comment