ក្រុមហង្សក្រហម Liverpool បានបើកសករាជថ្មីរបស់ខ្លួន ជាមួយនឹងអ្នកចាត់ការថ្មី Jurgen Klopp បានត្រឹមបញ្ចប់លទ្ធផលស្មើគ្នា ០-០ ប៉ុណ្ណោះ ទល់ក្រុម Tottenham Hotspur នៅកីឡដ្ឋាន White Hart Lane ខណៈដែលក្រុមខ្លាំងៗផ្សេងទៀតដែលប្រកួតនៅម៉ោងបន្ទាប់ ឈ្នះទាំងអស់នៅ Premier League យប់មិញ។
អ្នកចាត់ការសញ្ជាតិអាល្លឺម៉ង់ Klopp បានដឹកនាំហង្សក្រហមប្រកួតដំបូង ដោយត្រូវជួបរឿងយ៉ាប់យ៉ឺន បន្ទាប់ពីកីឡាករសំខាន់ៗជាច្រើនដូចជា Christian Benteke, Roberto Firmino, Danny Ings, Joe Gomez, Jordan Henderson និង Daniel Sturridge សុទ្ធតែរបួស។ តែយ៉ាងណា អ្នកចាំទីដៃស្អិត Simon Mignolet គឺជាអ្នកជួយសង្គ្រោះដើម្បីយកបាន១ពិន្ទុពី Spurs បាន បន្ទាប់ពីការស៊ុតរបស់ Clinton Njie និង Harry Kane។
រីឯក្រុមកំពូលតារាង Manchester City វិញ ទោះជារបួសតារាសំខាន់ Sergio Aguero និង David Silva ពិតមែន តែកីឡាករចំណូលថ្មី Raheem Sterling ដែលទិញពី Liverpool ធ្វើបានហ៊ែតទ្រីកនៅនាទី (៧ , ២៩, ៤៥) ខណៈដែលមេឃខៀវ ឈ្នះ Bournemouth ៥-១។ ២គ្រាប់ទៀត របស់ Man City គឺរកបានដោយ Wilfried Bony នាទី១១ និង៨៩ ឯ១គ្រាប់ក្រុមភ្ញៀវ គឺរកបានដោយ Murray នាទី២២។
ចំណែកឯក្រុមបិសាចក្រហម Manchester United វិញ ក៏ស៊ី Everton ផុយៗ ៣-០ ដែរ ខណៈដែលកីឡាករចំណូលថ្មី Morgan Schneiderlin ស៊ុតគ្រាប់ដំបូងរបស់ខ្លួនឲ្យ Man Utd នាទី១៨ Ander Herrera ថែមគ្រាប់ទី២ នាទី២២ និង Wayne Rooney ស៊ុតគ្រាប់ទី៣ នៅនាទី៦២ និងជាគ្រាប់បាល់ក្រៅដីលើកដំបូង ក្នុងការប្រកួត១១លើកចុងក្រោយផងដែរ សម្រាប់ប្រធានក្រុមជម្រើសជាតិអង់គ្លេសរូបនេះ។
ងាកទៅក្រុមម្ចាស់ជើងឯក Chelsea វិញ បានស្តាមុខមាត់វិញបានហើយ ដោយឈ្នះ Aston Villa ២-០បន្ទាប់ពីខ្សែប្រយុទ្ធ Diego Costa ដែលទើបតែត្រឡប់ពីការពិន័យ ស៊ុតគ្រាប់នាំមុខនាទី៣៤ និងខ្សែការពារ Alan Hutton របស់ Aston ធ្វើឲ្យចូលទីខ្លួនឯង នាទី៥៤ទៀត។
សម្រាប់កាំភ្លើងធំ Arsenal ដែលប្រកួត នៅពាក់កណ្ដាលអាធ្រាត្រ ក៏មិនសំចៃដៃដែរ ពោលគឺបានលត់ម្ចាស់ផ្ទះ Watford ៣-០ ដែលធ្វើបានដោយ Alexis Sanchez នាទី៦២, Olivier Giroud នាទី៦៨ និង Aaron Ramsey នាទី៧៤ទៀត៕
សូមទស្សនាវីដេអូខាងក្រោម៖
0 comments:
Post a Comment