និយាយដោយស្រួលស្ដាប់ វដ្ដផលិតផលបង្ហាញពីដំណាក់កាលទាំងប្រាំនៃការវិវឌ្ឍផលិតផល។ ចំពោះពាក្យនេះ គេច្រើនហៅវាដោយខ្លីថា PLC។ ទ្រឹស្ដីអាជីវកម្មមួយនេះនឹងបង្រៀនលោកអ្នកឱ្យបានដឹងថា តើថាផលិតផលនីមួយៗមានការវិវឌ្ឍយ៉ាងណា ជាពិសេសដំណាកកាលណា នឹងលេខមុខគូប្រជែងច្រើន។ ដំណាក់កាលសំខាន់ៗទាំងប្រាំនោះមាន៖
១) ការអភិវឌ្ឍន៍ (Development)៖ គឺជាដំណាក់កាលដំបូងនៃផលិតផល។ វាស្ថិតនៅក្នុងសាកល្បង ឬស្ថិតនៅក្នុងមន្ទីរពិសោធន៍នៅឡើយ។ ផលិតផលបានលេចចេញជារូបរាងនៅក្នុងដំណាក់កាលនេះ គឺកើតចេញពីការស្រាវជ្រាវពីតម្រូវការ និងការចង់បានពីអតិថិជន។ បើសិនជាការសាកល្បងទទួលបានផលជាវិជ្ជមាន វានឹងឈានដល់ការផលិត។ ជាទូទៅដំណាក់កាលនេះគឺជាដំណាក់កាលក្រុមហ៊ុនចំណាយច្រើន គ្មានទទួលបានចំណូល (ព្រោះផលិតផលមិនទាន់លក់បាន) ពោលគឺមានតែចំណាយមួយគត់។
២) ដំណាក់កាលចាប់ផ្ដើម (Introduction) ៖ ជាដំណាក់កាលដែលផលិតផលត្រូវបានដាក់នៅលើទីផ្សារជាលើកដំបូង។ ដំណាក់កាលនេះគឺការលក់មានទំហំតូចព្រោះថាអតិថិជនមិនទាន់ស្គាល់ច្រើន។ ការចំណាយផ្សេងៗក៏មានចំនួនច្រើនដែរ ជាពិសេសគឺកញ្ចប់ថវិកាចំណាយសម្រាប់ការផ្សព្វផ្សាយតែម្ដងព្រោះដើម្បីឱ្យអតិថិជនបានស្គាល់ផលិតផលឱ្យបានច្រើន។ គោលដៅចំណងនៃដំណាក់កាលនេះ គឺបង្កើតទីផ្សារមួយសម្រាប់ផលិតផល និងបង្កើតតម្រូវការមកលើផលិតផលនោះ។
៣) ដំណាក់កាលកើនឡើង (Growth)៖ ប្រសិនបើការផ្សព្វផ្សាយបានល្អ ស្របពេលដែលក្រុមហ៊ុនអាចបង្កើតទីផ្សារ (បង្កើតតម្រូវការ) មួយសម្រាប់ផលិតផលរបស់ខ្លួនបានជោគជ័យហើយនោះ នោះគឺឈានដល់ដំណាក់កាលនៃកំណើន។ មានន័យថា ការលក់ចាប់ផ្ដើមមានការកើនឡើង ហើយជាពេលដែលក្រុមហ៊ុនអាចទទួលបានចំណេញក្រាស់ក្រែលផងដែរ។
៤) ដំណាក់កាលឆ្អែត (Maturity) ៖ គឺជាដំណាក់កាលនៃការទទួលបានប្រាក់ចំណេញខ្ពស់បំផុត (កម្រិតអតិបរមា) ព្រោះថាការលក់នឹងកើនឡើងយ៉ាងគំហុកតែម្ដង។ ម៉ាក ឬយីហោនៃផលិតផលគឺមានអតិថិជនស្គាល់ទូលំទូលាយ អ្វីដែលជាសញ្ញាណថ្មីមួយទៀតនោះគឺការលេចមុខគូប្រកួតដែលជាលទ្ធផល នឹងកាត់បន្ថយចំណែកទីផ្សារ និងតម្លៃ (អាចមានការប្រកួតប្រជែង តាមរយៈការកំណត់ថ្លៃ)។ ក្រុមហ៊ុនទៀតសោត ក៏ត្រូវបង្កើនការចំណាយដើម្បីទប់ទល់ជាមួយគូប្រកួតដែរ។ ជាទូទៅនៅដំណាក់កាលចុងក្រោយនៃដំណាក់កាលទី៤នេះ គឺផលិតផលគឺដល់ទីតាំងឆ្អែតមួយ ពោលគឺមិនអាចកើនឡើងទៀតទេ។
៥) ដំណាក់កាលថយចុះ (Decline)៖ យូរនិងឆាប់ ការលក់នឹងធ្លាក់ចុះដោយសារតែអតិថិជនចង់ផ្លាស់ប្ដូររសជាតិ និងជម្រើសរបស់គូប្រកួតប្រសើរជាង។ ដំណាក់កាលនេះ គឺជាដំណាក់កាលដែលក្រុមហ៊ុនត្រូវគិតឡើងវិញ ថាតើគួរស្រង់ដើមតាមវិធីណា។ កែប្រែផលិតផលថ្មី ពង្រីកផលិតផល (product extension) ឬឈប់ផលិតតែម្ដង៕
0 comments:
Post a Comment