គ្មាននរណាម្នាក់ ចង់រស់នៅដោយ រកបានព្រឹកខ្វះល្ងាចនោះទេ ពោលគឺសុទ្ធតែចង់រស់នៅដោយ មានលុយចាយគ្រប់គ្រាន់ទៅតាមការចង់បានរបស់ខ្លួន។ ការរកចំណូលឲ្យបានច្រើន វាពិតជាសំខាន់ ប៉ុន្តែវាមិនមែនជាការងាយស្រួលក្នុងនោះ ព្រោះក្នុងពេលបច្ចុប្បន្ននេះ វាពិតជាមានការប្រកួតប្រជែងយ៉ាងខ្លាំងលើគ្រប់វិស័យទាំងអស់។ ដូច្នេះហើយ ដើម្បីអាចទទួលបានប្រាក់កម្រៃខ្ពស់នោះ តោងតែមនុស្សម្នាក់ៗមានលក្ខណៈសម្បត្តិគ្រប់គ្រាន់។
ទាំងនេះគឺជា គន្លឹះមួយចំនួន ដើម្បីធ្វើឲ្យខ្លួនអ្នកកាក់កបនឹងការរកលុយឲ្យបានច្រើន៖
១) ព្យាយាមក្រេបជញ្ជក់យកចំណេះដឹង
មុននឹងចាប់ផ្តើមចូលប្រឡូកក្នុងកិច្ចការផ្សេងៗក្នុងសង្គមការងារនោះ អ្នកត្រូវតែមានចំណេះដឹងជាមុនសិន។ ចំណេះដឹងគឺជា ស្ពានដែលនាំមនុស្សទៅកាន់ទីកន្លែងដែលពួកគេចង់ទៅដល់។ ចំណេះដឹងគឺជាផ្នែកមួយសំខាន់ ដែលកំណត់ថា តើអ្នកនឹងទទួលបានប្រាក់កម្រៃប៉ុណ្ណា មានន័យថា បើចំណេះដឹងនៅខ្សោយ អ្នកពិតជាពិបាកក្នុងការរកលុយឲ្យបានច្រើនណាស់។ ដូច្នេះហើយ គួរតែព្យាយាមខិតខំរៀនសូត្រឲ្យបានច្រើនជាមុនសិន ព្រោះបើមានចំណេះដឹងខ្ពស់ហើយ អ្នកប្រាកដជា ដឹងច្បាស់ថា ត្រូវធ្វើយ៉ាងណាដើម្បីរកលុយឲ្យបានច្រើនហើយ។
២) បង្កើតបណ្ដាញឲ្យបានច្រើន
បើទោះបីជា អ្នកមានចំណេះដឹងច្រើនប៉ុណ្ណាក៏ដោយ ប៉ុន្តែបើខ្វះការប្រាស្រ័យទាក់ទងក្នុងសង្គមហើយ ពិតជាមានការលំបាកក្នុងការធ្វើកិច្ចការផ្សេង។ ការបង្កើតបណ្ដាញ គឺជាចំណុចដ៏ល្អបំផុតក្នុងសម័យបច្ចុប្បន្ន ព្រោះនៅពេលមានបណ្ដាញមានន័យថា អ្នកអាចទទួលបានចំណេះដឹងថ្មីៗ ហើយងាយស្រួលទាក់ទងមនុស្សទាំងឡាយណាដែលអាចផ្តល់អត្ថប្រយោជន៍សម្រាប់ការងាររបស់អ្នក។ ក្នុងន័យនេះ ការបង្កើតបណ្ដាឲ្យច្រើន គឺជួយឲ្យអ្នកមានឱកាសច្រើនក្នុងការបង្កើនប្រាក់ចំណូល ឬ រកលុយបានច្រើនជាងមុនតាមរយៈទំនាក់ទំនងដ៏មានតម្លៃនោះ។
៣) រៀនពីភាពបរាជ័យរបស់ខ្លួនអ្នក
ម្នាក់ៗសុទ្ធតែធ្លាប់បរាជ័យលើកិច្ចការជាច្រើន។ ប៉ុន្តែការបរាជ័យទាំងនោះ ក៏មានសារៈសំខាន់ណាស់ដែរ សម្រាប់ការអភិវឌ្ឍន៍ខ្លួនរបស់អ្នក ព្រោះវាជាមេរៀនដ៏មួយ សម្រាប់ត្រួសត្រាយផ្លូវទៅកាន់ភាពជោគជ័យនៅពេលខាងមុខ។ ដូច្នេះ ត្រូវចេះទាញយកប្រយោជន៍ពីការបរាជ័យរបស់អ្នក តាមតែអាចធ្វើទៅបាន ដើម្បីភាពរីកចម្រើន ឬ ដើម្បីទទួលបាននូវប្រយោជន៍ធំធេងសម្រាប់ជីវិត។
៤)រៀនពីភាពជោគជ័យរបស់អ្នកដទៃ
ដើម្បីក្លាយជាមនុស្សដែល អាចរកលុយបានច្រើននោះ អ្នកអាចធ្វើការសិក្សាពីមនុស្សទាំងឡាយណាដែលមានភាពជោគជ័យ ក្នុងការងាររបស់ពួកគេ។ ការរៀនសូត្រនេះ គឺអាចជួយឲ្យអ្នកមានគំនិតល្អៗ ក្នុងការរៀបចំយុទ្ធសាស្ត្រច្បាស់លាស់មួយ ដើម្បីអាចធ្វើអ្វីមួយយ៉ាងជោគជ័យ ក្នុងជីវិតការងារ ឬ ការរកស៊ីផ្សេងៗ៕
0 comments:
Post a Comment