សេវាកម្មថតរូបមុនរៀបការដែលភាគច្រើនមិត្តអ្នកអាននិយមហៅតាមភាសាអង់គ្លេសថា pre-wedding បច្ចុប្បន្នកំពុងពេញនិយមក្នុងទីផ្សារកម្ពុជា ដែលនាំឲ្យអ្នកប្រកបរបបខាងផ្គត់ផ្គង់សេវានេះ កាក់កបគួរសមរម្យដែរ អំឡុងរដូវការម្ដងៗ។
ម្ចាស់អាជីវកម្មថតរូប I Photo Plus Studio លោក ទូច សុធី ឲ្យដឹងថា លោកអាចទទួលបានគម្រោងថតរូបមុនរៀបការបានគួរសមរម្យដែរ បើគិតចាប់ពីខែវិច្ឆិកា មកទល់នឹងពេលនេះ គឺទទួលបានចន្លោះពី ៣-៤ ហើយអាចនឹងកើនឡើងសម្រាប់ខែ៤-៥ ខាងមុខ។ ចំពោះតម្លៃវិញអាស្រ័យលើប្រភេទនៃការជ្រើសរើសរបស់អតិថិជន ឬតម្រូវការជាក់ស្តែង។
លោកបន្តថា សម្រាប់ការថតរូបមុនរៀបការនេះ មានការធ្លាក់ចុះ អំឡុងខែវស្សា ។ លោកថា ការថតរូបមុនពេលរៀបការដែលប្រើប្រភេទកាមេរ៉ា Canon DSL គឺពេញនិយមភាគច្រើនសម្រាប់គូស្វាមី ភរិយាដែលមានអាយុប្រហែល ២៥ឆ្នាំ ឬលើសនេះបន្តិចបន្តួច ព្រោះកាមេរ៉ានេះ ជាប្រភេទកាមេរ៉ាដែលថតទៅមានរូបភាពច្បាស់ខ្លាំង។
បុគ្គលិកផ្នែករៀបចំតុបតែង និងGraphic Design បងស្រី ឡានី ឲ្យ The BNEWS ដឹងថា ហាងថតរូប Victory Photo Studio អាចទទួលភ្ញៀវមកថត Pre-wedding ចន្លោះពី ៣០-៤០គម្រោងក្នុងមួយខែៗ។
បងស្រីបន្តថា ហាងថតរូប Victory Photo Studio អាចទទួលបានភ្ញៀវចំនួនប្រហែលប៉ុនខាងលើ ពីខែតុលា មកដល់ខែធ្នូ (រដូវការច្រើន) បន្តនឹងអាចឆ្លាក់ចុះខ្លះនៅខែបន្តបន្ទាប់។
ប្រធានផ្នែកទីផ្សារនៃក្រុមហ៊ុន G-Rise Photography លោក តាន់ លីនណា ប្រាប់ TheBNEWS ថា ការថតរូបមុនពេលរៀបការមានការរីកលូតលាស់ខ្លាំងនៅប៉ុន្មានឆ្នាំ ចុងក្រោយនេះ មិនថាអតិថិជននៅក្នុង ឬក្រៅស្រុកនោះទេ ពូកគេមួយចំនួន ត្រូវការសេវាកម្មនេះ។ លោកមានប្រសាសន៍ដូច្នេះថា ៖«និយាយទៅ ភ្ញៀវរបស់ខ្ញុំមិនមែនមានតែនៅទីក្រុង ឬខេត្តនោះទេ ភ្ញៀវបរទេសដែលមកពីអាមេរិក កាណាដា អង់គ្លេស បារាំង អូស្ត្រាលី ហុងកុង អីក៏មករកសេវាកម្មនេះដែរ»។
នៅក្នុងការផ្តល់សេវាកម្មផ្នែកថតរូបនេះ ក្រុមហ៊ុន G-Rise Photography កំណត់សេវាជាកញ្ចប់ លោក លីនណា បានបញ្ជាក់ថា ៖ «ភ្ញៀវ មកថតអាចទៅតាមសមត្ថភាព និងធនធានដែលគាត់មាន។ គាត់អាចជ្រើសរើសថតកន្លះថ្ងៃនៅទីក្រុងភ្នំពេញខាងខ្ញុំគិត សេវាកម្ម ៧០០ដុល្លារ ហើយបើមួយថ្ងៃខាងខ្ញុំគិត ១.០០០ដុល្លារ ហើយបើយើងទៅតាមខេត្តតម្លៃសេវាកម្មគិតពីរថ្ងៃគឺ ២.០០០ដុល្លារ »។
ការថតរូបមុនពេលរៀបការ (Pre-wedding) គឺជាឈុតឆាកមួយប្រភេទ ដែលថតនៅតាមតំបន់ទេសចរណ៍ ឬទីកន្លែងមានទេសភាពស្អាតៗបែបធម្មជាតិ។ ការថតរូបនេះអាចមានតម្លៃចាប់ពី ៥០០ដុល្លាររហូត ១.០០០ ឬ២.០០០ដុល្លារអាមេរិក៕
0 comments:
Post a Comment