ស្ថាបនិកស្ថាប័នស្ថាបនាអ្នកដឹកនាំ Vbuild Leaders លោក សយ សាវុត
ជាស្ថាបនិកនៃស្ថាប័នស្ថាបនា អ្នកដឹកនាំ vbuild leaders លោក សយ សាវុត ធ្លាប់មានប្រវត្តិ មិនចូលចិត្តរៀនសូត្រ កាលពីនៅវ័យកុមារភាព មុនពេលលោកបានប្រឡងជាប់អាហារូបករណ៍នៅ សាកលវិទ្យាល័យ វេទមហាប្ញសី ក្នុងខេត្តព្រៃវែង ជំនាញគណនេយ្យ រហូតទទួលបានការងារជាបន្តបន្ទាប់ ជាអ្នកទីផ្សារ និង ផ្នែកទំនាក់ទំនងដ៏ឆ្នើម ម្នាក់នៅ ក្រុមហ៊ុនជាតិ និង អង្គការអន្តរជាតិ មួយចំនួន និង បច្ចុប្បន្នជាប្រធានក្រុមប្រឹក្សាភិបាល នៃ អង្គការសកម្មភាពព្រះពុទ្ធសាសនាដើម្បីអភិវឌ្ឍសង្គម (BSDA) និង ជាគ្រូបណ្តុះបណ្តាលភាពជាអ្នកដឹកនាំដ៏ល្បីឈ្មោះម្នាក់ក្នុងទីក្រុងភ្នំពេញ។
តើអ្វីទៅ ជាកត្តាជំរុញចិត្ត ឲ្យលោកសាវុត ផ្លាស់ប្ដូរទម្លាប់ ពីមិន ចូលចិត្តរៀនសូត្រ ដែលបានត្រួតថ្នាក់បីឆ្នាំ បែរមកជារៀនពូកែ រហូតទទួលបាន អាហាររូបករណ៍ នៅសាកលវិទ្យាល័យ វេទមហាប្ញ សី?
លោក សយ សាវុត ឲ្យ ដឹងថា លោកមាន ស្រុកកំណើតនៅខេត្តបាត់ដំបង។ លោកគឺជាកូនកំព្រាម្ដាយ តាំងពីក្មេង។ កាលពីរៀននៅបឋមសិក្សា លោក សាវុត មិនចូលចិត្ត រៀនសូត្រទេ ដោយកាលពីនៅរៀន ថ្នាក់ទី៥ លោកធ្លាប់រៀនត្រួត ថ្នាក់ ដល់ទៅបីដង។
លោកថា ហេតុផលដែលលោករៀនត្រួតថ្នាក់ដល់ទៅបីដងនោះ គឺ ដោយសារតែ ប្រឡងកាឡេស លើកទី១ ប្រឡងធ្លាក់ លើកទី២អត់ទៅប្រឡង ព្រោះត្រូវផ្លាស់ពីបាត់ដំបងមកភ្នំពេញរស់នៅជាមួយឪពុកមា និង លើកទី៣ រៀននៅភ្នំពេញក៏បានប្រឡងជាប់ជាស្ថាពរ។
លោក សាវុត រៀនបឋមសិក្សា នៅសាលាសន្សំកុសល អនុវិទ្យាល័យ ផ្សារដើមថ្កូវ និង វិទ្យាល័យច្បារអំពៅ។ នៅពេលរៀន ដល់ អនុវិទ្យាល័យ លោក សាវុត ក៏ នៅតែ មិនបានប្តូរគំនិត ជាខិតខំរៀនអីទេ ព្រោះលោកគិតថាមិនដឹងរៀនដើម្បីអ្វី? រៀនចេះ ទៅ មានន័យអីនោះទេ? លោកថា កាលលោកនៅតូចមិនបានយល់ច្បាស់ពី អត្ថប្រយោជន៍នៃ ការរៀនសូត្រ។
កាលនៅរៀនអនុវិទ្យាល័យ លោកបានប្រឡងសាកល្បងធ្លាក់ ឌីប្លូម (សញ្ញាបត្រ បឋមភូមិ) នៅពេលនោះ លោកត្រូវ បាន ឪពុកមា ស្ដីបន្ទោស ហើយព្រមានថា បើមិនខំរៀនទេ នឹងបញ្ជូនឲ្យទៅស្រុក វិញហើយ ថែមទាំងព្រលយពាក្យថា ឱ្យទៅធ្វើស្រែ បើលោកមិនខំរៀនបែបនេះ។
ពេលឮការស្ដីបន្ទោស ពីឪពុកមាបែបនេះ លោកសាវុត បានភ្ញាក់ខ្លួន ហើយគិតថា ខ្លួនប្រាណលោកតូច មិនអាចអូសរទេះ ឬ នង្គ័លភ្ជួរដី បានទេ បើនៅភ្នំពេញ ចាប់អាជីពជាអ្នករត់ម៉ូតូឌុប ក៏ ពិបាកដែរ ព្រោះខ្លួនមានមាឌល្អិត ហើយមិនសូវមានកម្លាំងកំហែងទៀត។ អីចឹង មានតែ លោកដាក់ចិត្តខំរៀនទេ។ លោកបានប្រឹងប្រែង និងត្រៀមខ្លួន យ៉ាងល្អ ប្រហែល១ខែ ដើម្បីត្រៀមប្រឡង ហើយលោកក៏ប្រឡងជាប់ សញ្ញាប័ត្រ ឌីប្លូម ដូចការគិតទុក ដោយទទួលបាន និទ្ទេសល្អបង្គួរទៀតផង។
លោកបានរៀបរាប់បន្តថា ក្រោយពីបានប្រឡងជាប់ ឌីប្លូម លោកបានចូលរៀនបន្ត នៅវិទ្យាល័យច្បារអំពៅ ប៉ុន្តែពេលនោះ លោកក៏មិនសូវជាខំរៀនប៉ុន្មានដែរ ដោយសារមិនសូវមានលុយរៀនគួរ និង ទិញសៀវភៅផង ហើយលោកក៏មិនខិតខំពុះពារដដែល។ រហូតដល់ថ្នាក់ទី១២ លោកបានសុំគ្រូ ចូលរៀនគួរ ដោយមិនបង់ប្រាក់ ព្រោះរូបលោកមាន ជីវភាពខ្វះខាត ទើបលោកគ្រូអ្នកគ្រូ អនុញ្ញាតឲ្យរៀនគួរ ដោយឥតគិតថ្លៃ។
ចាប់ពីត្រៀមខ្លួនប្រឡងបាក់ឌុប (សញ្ញាបត្រទុតិយភូមិ) ឆ្នាំ ១៩៩៧-៩៨ រហូតបានជាប់លំដាប់លេខ២ប្រចាំវិទ្យាល័យនាឆ្នាំ១៩៩៨ នឹងបានប្រឡងជាប់ជាបន្តបន្ទាប់ រហូតបានអាហារូបករណ៍ នៅសាកលវិទ្យាល័យ មហាវេទឫសី។
លោកបានប្រឹងរៀនមុខវិជ្ជាទាំងអស់ក្នុងថ្នាក់សាកលវិទ្យាល័យ ជំនាញកុំព្យូទ័រ និង ភាសាអង់គ្លេស។ ថ្វីត្បិតតែ លោកបានបញ្ចប់ ថ្នាក់បរិញ្ញាបត្រ ជំនាញគណនេយ្យ ក្នុងឆ្នាំ ២០០២ លោកបានចាប់យកជំនាញជាអ្នកទីផ្សារវិញ ដោយសារ ការ ស្រឡាញ់ ជំនាញនេះ ជាងអ្វីដែលលោក ផ្តោតជាសំខាន់នៅ មហាវិទ្យាល័យ។ លោកតែងយកសៀវភៅធ្វើជាគ្រូលើការងារផ្នែកទីផ្សារ ការលក់ ការផ្សព្វផ្សាយ ការអភិវឌ្ឍខ្លួន ការគ្រប់គ្រង និង ការដឹកនាំ។
ដោយសារតែចំណេះដែលបានប្រឹងរៀន ជំនាញកុំព្យូទ័រ ភាសាអង់គ្លេសស្ទាត់ជំនាញ និង ចំណង់ចង់ជោគជ័យ លោកសាវុត បានវិវត្តខ្លួនជាបន្តបន្ទាប់ពី តួនាទីជាអ្នកសម្របសម្រួលផ្នែកទីផ្សារ រហូតដល់ប្រធាននាយកដ្ឋានផ្នែកទីផ្សារនៅតាមបណ្តាក្រុមហ៊ុន បរទេស និង អង្គការអន្តរជាតិមួយចំនួនក្នុងរាជធានីភ្នំពេញ។
មួយ បទពិសោធន៍ ចំណេះដឹង ចំណេះធ្វើ និង បំណងជួយដាស់តឿនដល់យុវជនជំនាន់ក្រោយ លោកបានសម្រេច បើកស្ថាប័នស្ថាបនាអ្នកដឹកនាំ ដែលមានឈ្មោះថា vbuild leaders ក្នុងឆ្នាំ២០១២ ដែលស្ថាប័ននេះ គឺផ្ដោតសំខាន់ទៅលើ វគ្គបណ្ដុះបណ្ដាលភាពជាអ្នកដឹកនាំ ការលក់ ការជំរុញលើកទឹកចិត្ត និង ការប្រឹក្សាយោបល់លើការងារទីផ្សារ៕
0 comments:
Post a Comment