លោកនាយករដ្ឋមន្ត្រីចក្រភពអង់គ្លេស David Cameron ដែលមានឈ្មោះពេញថា David William Donald Cameron បានក្លាយជាមេដឹកនាំគណបក្សអភិរក្សនិយមក្នុងឆ្នាំ ២០០៥ និងបានឈ្នះការបោះឆ្នោតជាតិក្លាយជានាយករដ្ឋមន្ត្រីអង់គ្លេសនៅឆ្នាំ ២០១០ និងបានក្លាយជាសមាជិកសភាអង់គ្លេសនៅក្នុងឆ្នាំ ២០០១ ។ នៅពេញមួយឆ្នាំ ២០១៥ នេះលោក David Cameron ត្រូវបានគេចាត់ទុកថាជាបុរសខ្លាំងលំដាប់លេខ ៨ ពិភពលោកនេះបើយោងតាមទស្សនាវដ្ដី Forbes ចង់ដឹងថាបុរសខ្លាំងលេខ ៨របស់ពិភពលោករូបនេះមានប្រវត្តិនិងបទពិសោធន៍ដូចម្ដេចខ្លះ?
លោក David Cameron កើតនៅថ្ងៃទី ០៩ តុលា ឆ្នាំ ១៩៦៦ នៅក្នុងទីក្រុងឡុងដុងប្រទេសអង់គ្លេស ដោយលោកក៏បានជាប់ខ្សែជាមួយព្រះអង្គម្ចាស់ King William IV ដែលមានគ្រួសារជាអ្នកមានស្ដុកស្ដម្ភហើយលោកទទួលបានការបណ្ដុះបណ្ដាលយ៉ាងល្អកាលនៅពីកុមារភាព។ លោក David Cameron បានចូលរៀនជំនាញទស្សនៈវិជ្ជានយោបាយ និង សេដ្ឋកិច្ច នៅក្នុងមហាវិទ្យាល័យ Brasenose របស់សាកលវិទ្យាល័យ Oxford ដោយបានបញ្ចប់ការសិក្សាក្នុងឆ្នាំ ១៩៨៨។ ក្រោយមកទៀតលោកបានចូលរួមជាមួយនឹងគណបក្សអភិរក្សនិយម ដោយបានក្លាយជាអ្នកប្រឹក្សាយោបល់ពិសេសអស់រយៈពេល ៥ ឆ្នាំ។
នៅក្នុងឆ្នាំ ១៩៩៤ លោក David Cameron បានចាកចេញពីវិស័យនយោបាយ ដោយលោកបានក្លាយជាអ្នកដឹកនាំកិច្ចការសាជីវកម្មមួយមានឈ្មោះថា Carlton Communications អស់រយៈពេល ៧ ឆ្នាំនិងបានលាលែងចេញពីតំណែងវិញនៅក្នុងឆ្នាំ ២០០១ ដើម្បីបន្តកិច្ចការក្នុងវិស័យនយោបាយ ដោយលោកបានឈ្នះក្នុងការបោះឆ្នោតយកកៅអីសភានៅឆ្នាំដដែលនេះ។ លោក David Cameron ត្រូវបានគេប្រកាសតែងតាំងធ្វើជាប្រធានគណបក្សអភិរក្សនិយមនៅក្នុងខែធ្នូឆ្នាំ ២០០៥។
៥ ឆ្នាំក្រោយលោក David Cameron បានឈ្នះលើយុទ្ធនាការ បោះឆ្នោតជាតិដោយបានក្លាយជានាយករដ្ឋមន្ត្រីដឹកនាំរដ្ឋាភិបាលជម្រុះរវាងគណបក្សអភិរក្សនិយម និង គណបក្សប្រជាធិបតេយ្យដោយពេលនោះលោក David Cameron ក្លាយជានាយករដ្ឋមន្ត្រីក្មេងជាងគេនៅអង់គ្លេសបន្ទាប់ពីលោក Lord Liverpool ឈ្នះឆ្នោតក្នុងឆ្នាំ ១៨១២ និងបានបំបែកកំណត់ត្រារបស់លោក Tony Blair ក្នុងឆ្នាំ ១៩៩៧។
មកទល់នឹងឆ្នាំ ២០១៥ លោក David Cameron បានឈ្នះលើយុទ្ធនាការបោះឆ្នោតជាតិសាជាថ្មី ជាមួយនឹងលទ្ធផលដ៏ភ្ញាក់ផ្អើលមួយដោយគណបក្សរបស់លោកបានឈ្នះអាសនៈភាគច្រើនក្នុងសភាដែលពុំធ្លាប់មានចាប់តាំងពីឆ្នាំ ១៩៩២ មក។
0 comments:
Post a Comment