Jose Mourinho បានចំអកឲ្យកូនក្រុមចាស់របស់ខ្លួន Iker Casillas កប់ៗ បន្ទាប់ពីក្រុមតោខៀវ Chelsea របស់លោក ទម្លាក់ក្រុម FC Porto ពី UEFA Champions League កាលពីយប់ថ្ងៃពុធ។
Chelsea បានឈ្នះ ២-០ នៅកីឡដ្ឋាន Stamford Bridge និងបានកៅអីមួយឡើងទៅវគ្គ១៦ក្រុម UEFA Champions League ខណៈដែលក្រុមមកពីព័រទុយហ្គាល់ បានធ្លាក់ត្រឹមវគ្គនេះ និងត្រូវធ្លាក់ទៅលេងនៅ UEFA Europa League វិញ។
ចំណែកឯវីរបុរសអេស្ប៉ាញ អ្នកចាំទី Casillas បានលេងពេញម៉ោងឲ្យ Porto ក្នុងប្រកួតនោះ ប៉ុន្តែក្រោយចប់ការប្រកួត ក៏ត្រូវអ្នកចាត់ការចាស់របស់ខ្លួនលោក Mourinho បាញ់ឲ្យធ្ងន់ៗស្ពឹកមុខថែមទៀត។
អ្នកចាត់ការរហស្សនាម “Special One” បានប្រាប់ដល់ស្ថានីយទូរទស្សន៍អេស្ប៉ាញ MEGA ថា៖ “គ្មានបញ្ហាអ្វីទេ។ ខ្ញុំធ្វើការងាររបស់ខ្ញុំ ហើយគាត់ (Casillas) ធ្វើការងាររបស់គាត់ ហើយគាត់ក៏ធ្វើបានល្អដែរ។ ឥឡូវ Casillas អាចនឹងឈ្នះពាន ដែលគាត់មិនដែលធ្លាប់ឈ្នះហើយ គឺ Europa League”។
Casillas និង Mourinho កាលនៅ Real Madrid
Mourinho និងកីឡាករវ័យ៣៤ឆ្នាំ Casillas ធ្លាប់ធ្វើការរួមគ្នានៅ Real Madrid ចន្លោះឆ្នាំ២០១០-២០១៣ ប៉ុន្តែទំនាក់ទំនងអ្នកទាំងពីរហាក់មានភាពប្រេះឆា នៅរដូវកាលចុងក្រោយរបស់ Mourinho ជាមួយក្រុមស្ដេចស ដោយសារអ្នកចាត់ការសញ្ជាតិព័រទុយហ្គាល់ បានទម្លាក់អ្នកចាំទីរូបនេះ ពីតំណែងដៃទី១នៅឆ្នាំ២០១២ និងទិញអ្នកចាំទីថ្មី Diego Lopez ជំនួសវិញ។
Casillas ធ្លាប់ឈ្នះពានរង្វាន់សរុបចំនួន២១ហើយ ក្នុងអាជីពរបស់គេ ដោយក្នុងនោះរួមមានទាំងពានធំៗ La Liga ៥ដង, UEFA Champions Leagues ៣ដងជាមួយ Real, Euro ២ដង និង World Cup ១ដងផងដែរជាមួយក្រុមជម្រើសជាតិអេស្ប៉ាញ ប៉ុន្តែនៅ UEFA Europa League ពុំដែលធ្លាប់ឈ្នះទេ៕
0 comments:
Post a Comment