 |
លោក Narendra Modi |
លោក Narendra Modi បច្ចុប្បន្នជានាយករដ្ឋមន្ត្រីទី១៥ របស់ប្រទេស ឥណ្ឌា ដោយលោកបានឈ្នះឆ្នោតនិងឡើងកាន់តំណែងតាំងពីថ្ងៃ ទី ២៦ ឧសភា ឆ្នាំ ២០១៤ មក។ មកទល់នឹងចុងឆ្នាំ ២០១៥ នេះឈ្មោះរបស់លោក Narendra Modi ត្រូវបានគេចាត់ទុកជាបុរសដែលមានឥទ្ធិពលបំផុតនៅលើពិភពលោកលំដាប់លេខ ៩ នេះបើយោងតាមទស្សានាវដ្តី Forbes។ តើលោក Narendra Modi មានបទពិសោធន៍ និង ប្រវត្តិដូចម្តេចខ្លះទើបបានក្លាយជានាយករដ្ឋមន្ត្រីឥណ្ឌាទី ១៥ និង ជាបុរសខ្លាំងលើលោកលំដាប់លេខ ៩ ដូច្នេះ?
លោក Narendra Modi ដែលមានឈ្មោះពេញថា Narendra Damodardas Modi កើតនៅថ្ងៃទី ១៧ ខែកញ្ញា ឆ្នាំ ១៩៥០ នៅក្នុងគ្រួសារអ្នកលក់គ្រឿងទេសមួយក្នុងសង្កាត់ Mehsana រដ្ឋធានី Bombay បច្ចុប្បន្នរដ្ឋនេះបានប្តូរឈ្មោះជា Gujarat ។ ក្នុងវ័យកុមារភាពលោក Modi បានជួយឪពុករបស់លោកលក់តែ ក្នុងស្ថានីយរថភ្លើងក្នុងសង្កាត់ដែលគ្រួសារលោករស់នៅ និង ក្រោយមកទៀតលោកនឹងបងប្រុសបានបើកហាងលក់តែមួយនៅជិតចំណតរថយន្តក្រុង។
លោក Modi បានបញ្ចប់ថ្នាក់វិទ្យាល័យរបស់លោកពីសាលាក្នុងតំបន់ដែលលោករស់នៅ ក្នុងឆ្នាំ ១៩៦៧ ដែលនៅពេលនោះលោកត្រូវគ្រូនៅសាលាពិពណ៌នាថា ជាសិស្សដែលមានចំណាត់ថ្នាក់មធ្យមក្នុងសាលា ហើយលោកតែងតែចំណាយពេលជាច្រើននៅក្នុងបណ្ណាល័យ ដោយលោកត្រូវបានគេស្គាល់ច្បាស់ថាជាអ្នកដែលពូកែជជែកដេញដោល។ នៅពេលដែលលោក Modi ពេញវ័យលោកបានចូលអង្គការធ្វើការស្ម័គ្រចិត្តមួយឈ្មោះ Rashtriya Swayamsevak Sangh (RSS) ដែលវាជាគណបក្សជាតិនិយមហិណ្ឌូ។
លោក Modi បានរៀបការនៅវ័យ ១៨ ឆ្នាំ ប៉ុន្តែលោកបានចំណាយពេលតិចតួចប៉ុណ្ណោះជាមួយនិងភរិយារបស់លោកដោយនៅទីបំផុតអាពាហ៍ពិពាហ៍របស់លោកត្រូវបានបញ្ចប់។ នៅឆ្នាំ ១៩៧៨ លោក Modi បានក្លាយជាសមាជិកពេញសិទ្ធរបស់គណបក្ស RSS ដោយនូវពេលនោះលោកបានទទួលសញ្ញាប័ត្របរិញ្ញាបត្រផ្នែកវិទ្យាសាស្ត្រនយោបាយ ពីសាកលវិទ្យាល័យ Delhi University ហើយប្រាំឆ្នាំ ក្រោយមកទៀត លោក Modi បានទទួលសញ្ញាបត្រថ្នាក់អនុបណ្ឌិត សិល្បៈ និង វិទ្យាសាស្ត្រនយោបាយពីសាកលវិទ្យាល័យ Guarat University។
នៅថ្ងៃទី ២៦ មិថុនា ឆ្នាំ ១៩៧៥ នាយករដ្ឋមន្ត្រី ឥណ្ឌា Indira Gandhi បានប្រកាសដាក់រដ្ឋក្នុងភាពអាសន្នរហូតមកទល់ឆ្នាំ ១៩៧៧។ ក្នុងអំឡុងពេលនោះ មានគណបក្សនយោបាយជាច្រើនត្រូវបានគេចោទប្រកាន់ដែលក្នុងនោះមានទាំងគណបក្ស RSS ផង ដែលធ្វើឲ្យលោក Modi បង្ខំលាក់ខ្លួនក្រោមដី និង ត្រូវធ្វើដំណើរញឹកញាប់ដើម្បីគេចពីការចាប់ខ្លួន។ មកដល់ឆ្នាំ ១៩៨៥ លោក Modi ត្រូវបានគេទទួលឲ្យចូលក្នុងគណបក្ស Bharatiya Janata Party (BJP)។ បីឆ្នាំក្រោយលោក Modi ត្រូវគេបោះឆ្នោតឲ្យធ្វើជា លេខារបស់បក្ស ដែលធ្វើឲ្យលោកមានឱកាសដើម្បីប្រកួតប្រជែងក្នុងការបោះឆ្នោតជាតិ។
ប៉ុន្តែគណបក្ស BJP របស់លោក Modi មិនដែលទទួលបានជោគជ័យឡើយក្នុងបោះឆ្នោតជាតិឡើយគ្រាន់តែលោកបានក្លាយជាសមាជិកសភាឥណ្ឌានិងកាន់តំណែងជាច្រើនក្នុងជួររដ្ឋាភិបាល។ លោកModi ត្រូវរងចាំរហូតដល់ឆ្នាំ ២០១៤ ពោលគឺថ្ងៃ ២៦ ឧសភាឆ្នាំដដែលគឺដែលលោកបានស្បថចូលកាន់តំណែងបន្ទាប់ពីទទួលបានជ័យជម្នះក្នុងការបោះឆ្នោតជាតិ។ បច្ចុប្បន្នលោកជានាយករដ្ឋមន្ត្រីទី១៥ របស់ប្រទេស ឥណ្ឌា និង ជាបុរសខ្លាំងលំដាប់លេខ ៩ ពិភពលោកសម្រាប់ឆ្នាំ ២០១៥ នេះ។
0 comments:
Post a Comment