ជំនាញសហគ្រិនទាំង ៥ ដែលអ្នកគប្បីបង្រៀនកូនរបស់អ្នកឲ្យក្លាយជាបុគ្គលឆ្នើម entrepreneur
ពាក្យចាស់ពោលថាពត់ដែកទាន់នៅក្ដៅ នេះជាសុភាសិតមួយដែលបានឆ្លុះបញ្ចាំងយ៉ាងច្បាស់ក្នុងការបង្ហាត់បង្រៀនក្មេងតូចៗ ឲ្យក្លាយជាបុគ្គលមួយដ៏ត្រឹមត្រូវ និង អាចក្លាយជាបុគ្គលឆ្នើមនៅពេលដែលពួកគេធំឡើង។ ប៉ុន្តែបញ្ហានៅត្រង់ថាតើអ្នកយល់ពីចរិតលក្ខណៈរបស់បុគ្គលជោគជ័យដល់កម្រិតណាក្នុងការណែនាំកូនរបស់អ្នកឲ្យអនុវត្តតាម។ ដូច្នេះចូរអ្នកសាកល្បងនូវចំណុចទាំង ៥ ខាងក្រោមនេះ វានឹងអាចជួយធ្វើឲ្យកូនរបស់អ្នកក្លាយជាបុគ្គលឆ្នើមមួយរូប។
១) បង្រៀនឲ្យចេះមានភាពអត់ទ្រាំ
ជីវិតគឺពិតជាមានលក្ខណៈសាមញ្ញខ្លាំងណាស់ ប៉ុន្តែវាមិនមានភាពងាយស្រួលនោះទេក្នុងការធ្វើដំណើរលើខ្សែផ្លូវដ៏វែងឆ្ងាយរបស់បុគ្គលម្នាក់ៗ ព្រោះផ្លូវដែលអ្នកដើរជាក់ស្ដែងវានឹងមិនដូចអ្វីដែលអ្នកគិតនោះទេ។ ជីវិតគឺពោរពេញដោយភាពសប្បាយរីករាយទុក្ខលំបាក ជោគជ័យ បរាជ័យ គឺសុទ្ធតែគ្មាននរណាម្នាក់គេចផុតឡើយ ដូច្នេះការចេះធ្វើឲ្យខ្លួនឯងជាមនុស្សដែលមានភាពអត់ធន់ខ្ពស់គឺជារឿងសំខាន់បំផុត ព្រោះថាសហគ្រិនដែលជោគជ័យភាគច្រើនសុទ្ធតែជាមនុស្សមានភាពអត់ធន់ នឹងប្រឹងប្រែងបំផុតដើម្បីទទួលបានជោគជ័យត្រលប់មកវិញ នូវពេលដែលពួកគេបរាជ័យ។
២) បង្រៀនឲ្យពួកគេចេះគិត និង បង្កើតភាពច្នៃប្រឌិតដោយខ្លួនឯង
គ្រប់បុគ្គលដែលជាសហគ្រិនឆ្នើមគឺសុទ្ធជាមនុស្សដែលមានការគិតខ្ពស់ និងលឿនបំផុតក្នុងការដោះស្រាយបញ្ហាដែលមានភាពស្មុគស្មាញប្រកបដោយភាពយុត្តិធម៌បំផុត។ ដូច្នេះការបង្កើតឲ្យមានគំនិតច្នៃប្រឌិតគឺជារឿងចម្បងដែលសហគ្រិនគ្រប់រូប អាចបង្កើតឲ្យមានភាពខ្លាំងរបស់ខ្លួន។ ដើម្បីជួយជំរុញឲ្យកូនៗរបស់អ្នកចេះបង្កើតគំនិតច្នៃប្រឌិត អ្នកត្រូវអនុញ្ញាតឲ្យពួកគេលេងល្បែងដែលពួកគេចូលចិត្ត ព្រោះនៅពេលដែលពួកគេលេងបានចាប់ផ្ដើមធ្វើឲ្យពួកគេគិតពីវិធីសាស្ត្រក្នុងការលេង និង វិធីដើម្បីទទួលបានជ័យជំនះ។
៣) បង្ហាត់បង្រៀនពួកគេឲ្យធ្វើជាមនុស្សឧស្សាហ៍ ហើយសកម្មនឹងការងារ
ជាទូទៅសហគ្រិនគ្រប់រូបគឺសុទ្ធតែជាមនុស្សមិនមានភាពអៀនខ្មាសនោះទេ ទៅលើអ្វីដែលពួកគេបង្កើតឡើងទោះបីជាវាមិនទទួលបានជោគជ័យក៏ដោយ។ ដូច្នេះដើម្បីធ្វើឲ្យក្មេងតូចៗមានភាពឧស្សាហ៍ព្យាយាមនឹងការងារ អ្នកត្រូវតែពន្យល់ពីតម្លៃការងារដែលពួកគេធ្វើ។ ដើម្បីធ្វើឲ្យពួកគេយល់ពីតម្លៃការងារអ្នកត្រូវផ្ដល់ភាពឯករាជ្យមួយឲ្យទៅពួកគេក្នុងការធ្វើអ្វីមួយ ដោយឲ្យពួកគេជាអ្នកទទួលខុសត្រូវដោយខ្លួនឯង។
៤) បង្រៀនឲ្យពួកគេធ្វើជាមនុស្សដែលចង់ចេះចង់ដឹង
សហគ្រិនគ្រប់រូបគឺសុទ្ធតែជាមនុស្ស ដែលពូកែស្រាវជ្រាវ និង សិក្សាមិនចេះចប់ក្នុងមួយឆាកជីវិតរបស់គេ។ ដើម្បីជួយធ្វើឲ្យកូនរបស់អ្នកក្លាយជាមនុស្សដែលចង់ចេះចង់ដឹង ត្រូវចូលរួមលើកទឹកចិត្តពួកគេឲ្យចូលរួមសកម្មភាពអ្វីមួយ ឬ អាចបង្កើតទម្លាប់ថ្មីមួយសម្រាប់ពួកគេដែលទាក់ទងនឹងចំណូលចិត្តរបស់ពួកគេផ្ទាល់ ។
៥) បង្រៀនឲ្យពួកគេចេះមានទំនុកចិត្តលើខ្លួនឯង
ការមានភាពជឿជាក់លើ សមត្ថភាពខ្លួនឯង គឺជារឿងមួយសំខាន់បំផុតដើម្បីធ្វើឲ្យខ្លួនឯងបានទទួលជោគជ័យ ចូរកុំភ្លេចថាសហគ្រិនគ្រប់រូបគឺជាមនុស្សដែលមានភាពជឿជាក់មុតមាំបំផុតទៅលើគំនិតរបស់ខ្លួន។ ដូច្នេះដើម្បីធ្វើឲ្យកូនរបស់អ្នកក្លាយជាមនុស្សដែលមានភាពជឿជាក់លើខ្លួនឯង អ្នកត្រូវផ្ដល់ឱកាសឲ្យពួកគេធ្វើការសម្រេចចិត្តលើរឿងអ្វីមួយដោយខ្លួនឯង ទោះបីជាពួកគេមិនធ្លាប់បានធ្វើវាពីមុនមកក៏ដោយ។
0 comments:
Post a Comment