បុគ្គល ៨ រូបដែលមានបញ្ញាខ្ពស់ជាងគេក្នុងពិភពលោក។ នៅក្នុងអត្ថបទនេះ សូមនាំអារម្មណ៍អស់លោកអ្នកឲ្យបានស្គាល់បុគ្គលប្រាំពីររូប ដែលរៀនចប់ថ្នាក់បណ្ឌិតនៅអាយុក្រោមម្ភៃឆ្នាំ ហើយដែលមានបញ្ញាខ្ពស់ និងអាចនិយាយបានច្រើនភាសាក្នុងវ័យក្មេងយកតែមែនទែន ត្រឹមតែ៩ ឬ១០ ឆ្នាំសោះអាចនិយាយបានច្រើនភាសាយ៉ាងស្ទាត់ជំនាញ។ ស្ដាប់មួយភ្លែត ហាក់ដូចជាមិនគួរជឿ ប៉ុន្តែនេះជាការពិតហើយត្រូវបានចុះផ្សាយនៅក្នុងសៀវភៅកំណត់ត្រាពិភពលោក Guinness Book ទៀតផង។
អាស្រ័យដោយសារសមត្ថភាពបញ្ញារបស់អស់លោក លោកស្រី អ្នកនាងកញ្ញា ដូចដែលរៀបរាប់ខាងក្រោមនេះ មានលក្ខណៈពិសេសលើសគេ ទើបសាកលវិទ្យាល័យអនុញ្ញាតឲ្យចូលរៀនថ្នាក់ឧត្ដមសិក្សា ដោយមិនចាំបាច់រៀនតាមសម្រួលពីថ្នាក់ទី១ ដល់ថ្នាក់ទី១២ ទេ ដែលមានន័យថាគេអាចរៀនផ្លោះថ្នាក់បាន។ នៅមានរឿងរ៉ាវជាច្រើនទៀត ដែលពាក់ព័ន្ធនឹងភាពឈ្លាសវៃ និងសមិទ្ធផលរបស់យុវជនអាយុក្រោម ២០ ឆ្នាំ ប្រកបដោយកោសល្យខ្ពស់បំផុត។ អត្ថបទនេះផ្ដោតជាសំខាន់លើបុគ្គលដែលមានសមត្ថភាពខ្ពស់នៅក្នុងការសិក្សា រហូតដល់រៀនចប់ថ្នាក់បណ្ឌិតដោយជោគជ័យ ខណៈដែលអស់លោក លោកស្រី អ្នកនាងកញ្ញាទាំងនោះ ស្ថិតក្នុងវ័យជាងដប់ឆ្នាំ។
១- លោកខាលវីត (Karl Witte) អាយុ ១៣ ឆ្នាំរៀនចប់បណ្ឌិត
លោកខាលវីត កើតនៅថ្ងៃទី០១ ខែកក្កដា ឆ្នាំ១៨០០ នៅប្រទេសអាល្លឺម៉ង់។ ពេលលោកអាយុ ៩ ឆ្នាំ លោកចេះនិយាយភាសាបារំាង – អាល្លឺម៉ង់ – អ៊ីតាលី – ឡាតាំង និងភាសាក្រិក។ នៅថ្ងៃទី១០ ខែមេសា ឆ្នាំ ១៨១៤ លោកទទួលបានសញ្ញាបត្របណ្ឌិតកម្រិតភីអេចឌី (Ph.D) ពីសាកលវិទ្យាល័យ Giessen ប្រទេសអាល្លឺម៉ង់ ក្នុងជន្មាយុ ១៤ ឆ្នាំ។ លោកខាលវីត ត្រូវបានកត់ត្រាក្នុងសៀវភៅ Guinness Bookជាអ្នករៀនចប់ថ្នាក់បណ្ឌិតវ័យក្មេងបំផុតនៅក្នុងប្រវត្តិសាស្ត្រ ហើយជាឯតទគ្គកម្ម ដែលមិនទាន់អ្នកណាបំបែកកំណត់ត្រានេះបាននៅឡើយទេ មកទល់នឹងពេលនេះ។
ប្រភព ៖ សព្វវចនាធិប្បាយ Wikipedia
២- លោកគីមអ៊ុងយ៉ុង (Kim Ung-Yong ) អាយុ ១៥ ឆ្នាំរៀនចប់ថ្នាក់បណ្ឌិត
លោកគីមកើតនៅថ្ងៃទី០៧ ខែមីនា ឆ្នាំ១៩៦២ នៅប្រទេសកូរ៉េខាងត្បូង។ អាយុមិនទាន់គ្រប់ ១៥ ឆ្នាំផង លោកបានបញ្ចប់ការសិក្សាថ្នាក់បណ្ឌិតផ្នែករូបវិទ្យា ពីសាកលវិទ្យាល័យកូឡូរ៉ាដូ (Colorado University) សហរដ្ឋអាមេរិក។
អាយុបួនឆ្នាំ លោកចេះអានភាសាជប៉ុន – ភាសាកូរ៉េ – ភាសាអាល្លឺម៉ង់ និងអង់គ្លេស។ នៅអាយុគម្រប់ប្រាំឆ្នាំ លោកអាចដោះស្រាយលំហាត់គណិតវិទ្យាកម្រិតខ្ពស់ ដូចជាលំហាត់អនុគមន៍ឌីហ្វេរ៉ង់ស្យែល និងអាំងតេក្រាល់ (intergral)។
រោយមក តាមកញ្ចក់ទូរទស្សន៍ជប៉ុន លោកគីមបាននិយាយយ៉ាងស្ទាត់ជំនាញនូវភាសាជាច្រើនដូចជា ៖ ភាសាចិន – អេស្ប៉ាញ – វៀតណាម – តាកាឡុក (Tacalog) – អាល្លឺម៉ង់ – អង់គ្លេស – ចិន – ជប៉ុន និងភាសាកូរ៉េ។ បច្ចុប្បន្ន លោកគីមអ៊ុងយ៉ុង មានអាជីពជាវិស្វករសំណង់ស៊ីវិល (civil engineer)។
៣- អ្នកស្រីរូតឡូរឹន (Ruth Lawrence) រៀនចប់ថ្នាក់បណ្ឌិតនៅអាយុ ១៧ ឆ្នាំ
អ្នកនាង Ruth Lawrence កើតនៅថ្ងៃទី ០២ ខែសីហា ឆ្នាំ១៩៧១ នៅប្រទេសអង់គ្លេស។ អ្នកនាងមានជំនាញខាងគណិតវិទ្យា។ ក្នុងវ័យ ១៣ ឆ្នាំ អ្នកនាងបានរៀនចប់ថ្នាក់បរិញ្ញាបត្រពីសាកលវិទ្យាល័យ Oxford ដ៏ល្បីល្បាញរបស់អង់គ្លេស និងជាអ្នកដំបូងបំផុតដែលបានសម្រេចសមិទ្ធផលបែបនេះនៅ Oxford។ នៅឆ្នាំ១៩៨៩ អ្នកនាងបានរៀនចប់ថ្នាក់បណ្ឌិតក្នុងវ័យមិនទាន់គ្រប់១៨ឆ្នាំផង។ ក្រោយពេលបញ្ចប់ការសិក្សា អ្នកស្រីត្រូវបានទទួលឲ្យចូលធ្វើការនៅសាកលវិទ្យាល័យហាវើត (Harvard University) សហរដ្ឋអាមេរិក ហើយជាសាកលវិទ្យាល័យដែលមានគុណភាពអប់រំខ្ពស់ផុតលេខក្នុងលោក។ បច្ចុប្បន្ន អ្នកស្រីរៀបការ និងកំពុងបម្រើការនៅសាកលវិទ្យាល័យនៅប្រទេសអ៊ីស្រាអែល។
ប្រភព ៖ ទូរទស្សន៍ BBC – សព្វវចនាធិប្បាយ Wikipedia
៤- លោក Norbert Wiener រៀនចប់បណ្ឌិតនៅអាយុ ១៧ ឆ្នាំ
លោក Norbert Wiener កើតនៅថ្ងៃទី២៦ ខែវិច្ឆិកា ឆ្នាំ១៨៩៤ នៅសហរដ្ឋអាមេរិក។ លោកមានជំនាញខាងគណិតវិទ្យា និងបានរៀនចប់ថ្នាក់បរិញ្ញាបត្រផ្នែកគណិតវិទ្យា ពីសាកលវិទ្យាល័យ Tufts University នៅអាយុ ១៤ ឆ្នាំ។ នៅឆ្នាំ១៩១២ ក្នុងជន្មាយុ ១៧ ឆ្នាំលោករៀនចប់ថ្នាក់បណ្ឌិតផ្នែកគណិតវិទ្យាពីសាកលវិទ្យាល័យហាវើត (Harvard University)។ ក្រោយមក លោកបានចូលបម្រើការងារជាសាស្ត្រាចារ្យនៅវិទ្យាស្ថានបច្ចេកវិទ្យាប្រចាំរដ្ឋម៉ាសាឈូសេត (Massachusett Institute of Technology -MIT) ជាវិទ្យាស្ថានដ៏ល្បីល្បាញខាងវិស័យបច្ចេកវិទ្យា។ លោកទទួលមរណភាពនៅថ្ងៃទី១៨ ខែមីនា ឆ្នាំ១៩៦៤។
ប្រភព ៖ សព្វវចនាធិប្បាយ Britannica – និង សព្វវចនាធិប្បាយ Wikipedia
៥- អ្នកនាងអាលីហ្សាសេបឺ (Alia Sabur) អាយុ ១៧ ឆ្នាំទទួលបានសញ្ញាបត្របណ្ឌិត
នាងអាលីហ្សា កើតនៅថ្ងៃទី២២ ខែកុម្ភៈ ឆ្នាំ ១៩៨៩ នៅសហរដ្ឋអាមេរិក។ ក្នុងវ័យ ១៩ ឆ្នាំ អ្នកនាងត្រូវបានតែងតាំងជាសាស្ត្រាចារ្យ (Professor) ប្រចាំសាកលវិទ្យាល័យ Konkuk ប្រទេសកូរ៉េខាងត្បូង ហើយជាមនុស្សអាយុតិចបំផុតនៅក្នុងប្រវត្តិសាស្ត្រពិភពលោក ដែលទទួលបានតំណែងនេះ។ នាងមានជំនាញខាងគណិតវិទ្យា។ ក្រៅពីនេះ នាងជាអ្នកផ្លុំឧបករណ៍ក្លារីណែត (Clarinet ស្រដៀងខ្លុយ) ដ៏ជំនាញម្នាក់។ អាយុ ៩ ឆ្នាំ នាងទទួលបានខ្សែក្រវាត់ខ្មៅមួយជាន់ខាងកីឡាតេក្វាន់ដូ (Tae Kwan-do) – ចូលរៀនថ្នាក់បរិញ្ញាបត្រនៅសាកលវិទ្យាល័យស្តូនីប៊្រូក (Sony Brook University) នៅអាយុ ១០ ឆ្នាំ។ នៅឆ្នាំ២០០៧ នាងបានរៀនចប់ថ្នាក់បណ្ឌិត (Ph.D) ពីសាកលវិទ្យាល័យ Drexel សហរដ្ឋអាមេរិក។
៦- លោកសូយ៉ាណូ (Sho Yano) រៀនចប់បណ្ឌិតនៅអាយុ ១៨ ឆ្នាំ
លោកកើតនៅថ្ងៃទី ២២ ខែតុលា ឆ្នាំ១៩៩០ នៅសហរដ្ឋអាមេរិក។ លោករៀនចប់បរិញ្ញាបត្រផ្នែកវិស័យសុខាភិបាល ឬវេជ្ជសាស្ត្រ នៅអាយុ ១២ ឆ្នាំ។ លោកចេះអាននៅអាយុ ២ ឆ្នាំ និងចេះសរសេរនៅអាយុ ៣ ឆ្នាំ។ លោករៀនចប់ថ្នាក់បណ្ឌិតផ្នែកវេជ្ជសាស្ត្រពីសាកលវិទ្យាល័យឈីកាហ្គោសហរដ្ឋអាមេរិកក្នុងអាយុ ១៨ ឆ្នាំ (ក្មេងបំផុតក្នុងប្រវត្តិសាស្ត្ររបស់សាកលវិទ្យាល័យនេះ)។ បច្ចុប្បន្ន លោកជាវេជ្ជបណ្ឌិតជំងឺទូទៅ (physician)។
៧- អ្នកនាង Juliet Beni រៀនចប់ថ្នាក់បណ្ឌិតផ្នែកចិត្តវិទ្យា នៅអាយុ ១៩ ឆ្នាំ
អ្នកនាង Juliet Beni បានរៀនចប់បណ្ឌិតផ្នែកចិត្តវិទ្យាសង្គម និងចិត្តវិទ្យាអាកប្បកិរិយា (Social/ Personality Psychology) ពីសាកលវិទ្យាល័យកាលីហ្វ័រញ៉ា (University of California) ហើយជានិស្សិតដំបូងបង្អស់របស់សាកលវិទ្យាល័យនេះដែលក្មេងបំផុត ហើយទទួលបានសញ្ញាបត្របណ្ឌិត។ ឆ្នាំ២០០៨ ក្នុងអាយុ ១៥ ឆ្នាំ នាងJuliet Beni រៀនចប់បរិញ្ញាបត្រ និងរៀនចប់ថ្នាក់បរិញ្ញាបត្រជាន់ខ្ពស់ (Master Degree) នៅឆ្នាំ២០១០។
កំណត់សម្គាល់ ៖ ទិន្នន័យខាងលើនេះត្រូវបានដកស្រង់ពីគេហទំព័រស្ដីពីបុគ្គលដប់រូបដែលរៀនចប់បណ្ឌិតនៅអាយុក្មេងបំផុត (http://www.gradschoolhub.com/10-youngest-people-ever-to-achieve-a-doctorate-degree/) ធ្វើជាអត្ថបទគោល ហើយ TheBNEWS បានដកស្រង់ពីប្រភពដទៃទៀតដើម្បីបញ្ជាក់ និងផ្ទៀងផ្ទាត់ឲ្យកាន់តែច្បាស់។
0 comments:
Post a Comment