លោកស្រីហ៊ីឡារី បានកោតសរសើរ «នយោបាយអន្តោប្រវេសន្ត» របស់លោកប្រធានាធិបតីបារ៉ាក់អូបាម៉ា។ ចំណែកលោកអូបាម៉ា ក៏បានកោតសរសើរចំពោះលោកស្រីវិញដែរ ហើយលោកនៅបានលើកឡើងទៀតថា លោកស្រីគ្លីនតុនសក្ដិសមជាអនាគតប្រធានាធិបតីអាមេរិកបំផុត។ លោកស្រីហ៊ីឡារី ត្រូវគេប្រមើលឃើញថា ជាជម្រើសល្អជាងគេក្នុងជួរគណបក្សប្រជាធិបតេយ្យ សម្រាប់ប្រជែងយកតំណែងប្រធានាធិបតីសហរដ្ឋអាមេរិក ក្នុងការបោះឆ្នោតអាណត្តិថ្មី។
ចង់ដឹងថា លោកស្រីហ៊ីឡារីគ្លីនតុន មានប្រវត្តិយ៉ាងដូចម្ដេចខ្លះ សូមនាំមកជូនអស់លោកអ្នក នូវប្រវត្តិសង្ខេបរបស់លោកស្រី ដោយផ្ដោតលើប្រវត្តិការងារ និងអាជីពនយោបាយរបស់លោកស្រីមានសេចក្ដីដូចតទៅ។
ឈ្មោះ ៖ ហ៊ីឡារីរ៉ូដាមគ្លីនតុន (Hillary Rodam Clinton)
អាយុ ៖ ៦៧ ឆ្នាំ
អាជីព ៖ ជាអ្នកនយោបាយ ខាងគណបក្សប្រជាធិបតេយ្យ
ថ្ងៃខែឆ្នាំកំណើត ៖ ២៦ តុលា ១៩៤៧
ទីកន្លែងកំណើត ៖ ទីក្រុងឈីកាហ្គោ (Chicago) រដ្ឋអ៊ីលីណយ – សហរដ្ឋអាមេរិក
កម្ពស់ ៖ ១៦៩ សង់ទីម៉ែត្រ
ស្វាមី ៖ លោកប៊ីលគ្លីនតុន (Bill Clinton) (រៀបអាពាហ៍ពិពាហ៍កាលពីឆ្នាំ១៩៧៥)
កូន ៖ កូនស្រីឈ្មោះនាង ឆែលស៊ី (Chelsea) កើតឆ្នាំ១៩៨០
គណបក្សនយោបាយ ៖ ១៩៦៨ – មកទល់នឹងបច្ចុប្បន្ន ៖ ជាសមាជិកគណបក្សប្រជាធិបតេយ្យ (Democratic Party)
កម្រិតវប្បធម៌ ៖ ១៩៦៩ : បរិញ្ញាបត្រពីសាកលវិទ្យាល័យ Wellesley College។ ១៩៧៣ : បណ្ឌិតច្បាប់ (Juris Doctor) ពីសាកលវិទ្យាល័យយេល (Yale University)។
ប្រវត្តិការងារ និងអាជីពនយោបាយ ៖ ២០០៩ – ២០១៣ ៖ កាន់តំណែងជារដ្ឋមន្ត្រីការបរទេសអាមេរិកពីឆ្នាំ។ ២០០១ – ២០០៩ ៖ កាន់តំណែងជាសមាជិកព្រឹទ្ធសភាសហរដ្ឋអាមេរិក ប្រចាំរដ្ឋញូយ៉ក។
លោកស្រីហ៊ីឡារី កើតថ្ងៃទី២៦ ខែតុលា ឆ្នាំ១៩៤៧។ ជីវិតពីកុមារភាពរបស់លោកស្រី ពោរពេញដោយភាពសុខដុមរមនា និងសេចក្ដីថ្លៃថ្នូរ (ជាពូជអម្បូរអ្នកខ្ពង់ខ្ពស់)។ តាំងតែពីក្មេងមក លោកស្រីចូលចិត្តវិស័យកីឡា និងមាននាទីជាប្រធានសមាគមន៍និស្សិត។ ពេលរៀននៅមហាវិទ្យាល័យ Wellesley College លោកស្រីតែងតែរៀនបានពិន្ទុខ្ពស់ជានិច្ច។ ឆ្នាំ១៩៦៩ លោកស្រីរៀនមុខវិជ្ជាច្បាប់នៅសាកលវិទ្យាល័យយេល (Yale University) និងបានធ្វើការជាលក្ខណៈកម្មសិក្សាការី ឬអ្នកហាត់ការ (intern) ហើយបានភប់ប្រសព្វជាមួយលោកប៊ីលគ្លីនតុន ដែលក្រោយមកអ្នកទាំងពីរក្លាយជាគូស្វាមីភរិយានឹងគ្នា ដោយបានរៀបអាពាហ៍ពិពាហ៍កាលពីឆ្នាំ១៩៧៥។
មាគ៌ាឆ្ពោះទៅប្រកួតយកតំណែងប្រធានាធិបតីអាមេរិកសម្រាប់អាណត្តិឆ្នាំ២០០៩ – ២០១៣
លោកស្រីហ៊ីឡារីជាដៃគូប្រជែងជាមួយលោកបារ៉ាក់អូបាម៉ា កាលពីឆ្នាំ២០០៨ សម្រាប់ប្រកួតយកតំណែងជាបេក្ខជនក្នុងគណបក្ស ដើម្បីឈានទៅប្រកួតជាមួយបេក្ខជនមកពីខាងគណបក្សសាធារណរដ្ឋ (Republican Party)។ លោកស្រីមិនបានឈ្នះតំណែងជាបេក្ខជនផ្ដាច់ព្រ័ត្រទេ ប៉ុន្តែត្រូវលោកអូបាម៉ាជ្រើសតាំងជារដ្ឋមន្ត្រីការបរទេសក្នុងរដ្ឋការរបស់លោកពីឆ្នាំ២០០៩ – ២០១៣។
លោកស្រីជានារីទីមួយនៅក្នុងនយោបាយសហរដ្ឋអាមេរិក ដែលកាន់មុខតំណែងជារដ្ឋមន្ត្រីការបរទេសអាមេរិក ហើយដែលមានអតីតភាពជា «ស្ត្រីទីមួយ – First Lady» (ភរិយាប្រធានាធិបតីកាលពីជំនាន់មុនលោកស្រី មិនដែលមានតំណែងបែបនេះទេ ពីមុនមក)។
មុខតំណែងជារដ្ឋមន្ត្រីការបរទេសអាមេរិកពីឆ្នាំ២០០៩ – ២០១៣
ក្នុងនាមជារដ្ឋមន្ត្រីការបរទេសអាមេរិក លោកស្រីហ៊ីឡារី ជារដ្ឋមន្ត្រីការបរទេសអាមេរិកដំបូងបង្អស់ដែលបានទៅបំពេញទស្សនកិច្ចជាផ្លូវរដ្ឋទៅកាន់បណ្ដាប្រទេសនានា ច្រើនជាងរដ្ឋមន្ត្រីការបរទេសអាមេរិកណាទាំងអស់ (១១២ ប្រទេស)។លោកស្រីតែងលើកស្ទួយ «សិទ្ធិស្ត្រី – women’s rights» និងសិទ្ធិមនុស្ស (human rights)។ ពាក់ព័ន្ធនឹង «បដិវត្តផ្កាម្លិះនៅមជ្ឈិមបូព៌ា – Arab Spring» លោកស្រី ក្នុងនាមជារដ្ឋមន្ត្រីការបរទេសអាមេរិក ក៏បានបង្ហាញគោលជំហររបស់រដ្ឋាភិបាលលោកអូបាម៉ាអាណត្តិទីមួយផងដែរ និងពាក់ព័ន្ធនឹងអន្តរាគមន៍យោធានៅប្រទេសលីប៊ី (ផ្ដួលរំលំលោកអតីតប្រធានាធិបតីនៃប្រទេសលីប៊ី (ហ្កាដាហ្វ៊ី) ពីតំណែង៕
0 comments:
Post a Comment