ជាធម្មតាទេ ការងារប្រចាំថ្ងៃតែងធ្វើឲ្យមនុស្សម្នាក់មានអារម្មណ៍ថា ស្មុគស្មាញ និង តានតឹងក្នុងចិត្ត ប្រការនេះធ្វើឲ្យប្រសិទ្ធភាពនៃការងារចុះអន់ខ្សោយ។ ការមិនសប្បាយចិត្តនេះ បណ្តាលមកពីកត្តាច្រើនយ៉ាង ដូចជា ការងារលំបាកពេក ការមិនចុះសម្រុងជាមួយអ្នកដទៃ ឬ ទីកន្លែងធ្វើការមិនសូវអំណោយផលជាដើម។ ដូច្នេះហើយ ក្នុងបញ្ចៀសបញ្ហាទាំងអស់នេះ យើងត្រូវតែមានវិធីសាស្ត្រមួយចំនួន ដើម្បីអាចធ្វើឲ្យអារម្មណ៍មានភាពរីករាយ នៅកន្លែងធ្វើការ។
ខាងក្រោមនេះ គឺជាគន្លឹះមួយចំនួនដែលធ្វើឲ្យអ្នក មានអារម្មណ៍ថា សប្បាយរីករាយនៅកន្លែងធ្វើការរបស់ខ្លួន៖
១) ដាក់កូនរុក្ខជាតិនៅតុធ្វើការ
ជាការពិតណាស់ថា មនុស្សម្នាក់ៗពិតជាត្រូវការរស់នៅជាមួយធម្មជាតិ ដើម្បីឲ្យមានសុខភាពល្អ និង អារម្មណ៍ប្រសើរ។ ប៉ុន្តែ ដោយសារតែនាពេលបច្ចុប្បន្ននេះ មនុស្សភាគច្រើនរស់នៅក្នុងទីក្រុង ហើយធ្វើការក្នុងការិយាល័យជាច្រើនម៉ោង ដូច្នេះហើយគ្មានពេលណាដើម្បីចំណាយពេលជាមួយធម្មតាជាតិនោះឡើយ។ ថ្វីបើបែបនេះក្តី យើងក៏អាចកែច្នៃបានដែរ ដើម្បីទទួលបានអត្ថប្រយោជន៍។
ចំពោះការធ្វើការនៅការិយាល័យ តាមរយៈការលម្អកូនរុក្ខជាតិតូចៗនៅលើតុធ្វើការ ព្រោះរុក្ខជាតិបៃតងពិតជា អាចជួយឲ្យអ្នកមានអារម្មណ៍ស្រស់ថ្លា និង អាចកាត់បន្ថយនូវអារម្មណ៍តប់ប្រមល់ជាច្រើនដែលបណ្តាលមកពីការងារ។ ហេតុដូច្នេះហើយបានជា នៅតាមការិយាល័យ ជាច្រើនខ្វះរុក្ខជាតិតូចទាំងនោះឡើយ។
២) ពង្រឹងចំណងមិត្តភាព
ចំណុចសំខាន់មួយដែលធ្វើឲ្យអ្នកមានអារម្មណ៍ធុញទ្រាន់ចំពោះ ការងាររបស់ខ្លួនក៏ដោយសារតែ នៅកន្លែងធ្វើការ មិនមានទំនាក់ទំនងល្អជាមួយនឹងបុគ្គលិកផ្សេងទៀត ឬ គ្មានការសាមគ្គីគ្នា។ ការសាមគ្គីពិតជាមានសារៈសំខាន់ខ្លាំងណាស់ ព្រោះ គ្មាននរណាម្នាក់ អាចធ្វើការគ្រប់យ៉ាងក្នុងក្រុមហ៊ុនតែម្នាក់ឯងនោះទេ ពោលគឺត្រូវការការខិតខំពីបុគ្គលិកម្នាក់ៗជាចាំបាច់។ ដូច្នេះហើយ ដើម្បីឲ្យខ្លួនអ្នកមានអារម្មណ៍ថា រីករាយនិងពេញចិត្តនៅកន្លែងធ្វើការនោះ ត្រូវតែចាប់ផ្តើមសាងទំនាក់ទំនងល្អជាមួយអ្នកជុំវិញខ្លួន។
៣) ចេះអត់ឱនខ្លួនឯង
គ្មាននរណាម្នាក់ ចងសាងកំហុសនោះទេ ពោលគឺសុទ្ធតែចង់ជោគជ័យទាំងអស់ ប៉ុន្តែវាពិតជាពិបាកជៀសឲ្យផុតពីបញ្ហាផ្សេងៗដែលកើតឡើងត្រង់ប្រការណាមួយ។ ក្នុងស្ថានភាពនេះ ប្រសិនបើអ្នក អ្នកស្តីបន្ទោសលើខ្លួនឯងខ្លាំងពេកនៅពេលមានកំហុសអ្វីមួយនោះ វាធ្វើឲ្យអារម្មណ៍តានតឹងកាន់តែខ្លាំង ហើយក៏គ្មានកម្លាំងចិត្តណាទៅបន្តការងារឲ្យបានល្អទៀត។ ដូច្នេះ ត្រូវតែចេះអត់ឱនឲ្យខ្លួនឯង នៅពេលសាងកំហុសអ្វីមួយ ប៉ុន្តែអ្នកត្រូវខិតខំធ្វើវាឲ្យបានល្អឡើងវិញ ។
៤) គិតបែបវិជ្ជមាន
ការគិតពិតជាមានសារៈសំខាន់ខ្លាំងណាស់សម្រាប់មនុស្សម្នាក់ៗ ព្រោះបើគិតថា អាក្រក់ ប្រាកដណាស់ថា អ្វីៗប្រាកដជាអាក្រក់ ហើយបើគិតតែល្អ អ្វីៗប្រាកដជាល្អមិនខាន។ ដូច្នេះហើយ អ្នកគួរតែព្យាយាមគិតអ្វីដែលវិជ្ជមានលើការងាររបស់អ្នក បើទោះបីជាមានបញ្ហាជាច្រើនកើតឡើងក្តី ព្រោះវាជាកម្លាំងចិត្តដ៏សំខាន់ដែល ធ្វើឲ្យខ្លួនអ្នកអាចបន្តដំណើរទៅមុខទៀត ដើម្បីឈានទៅរកភាពជោគជ័យ។ ដូច្នេះហើយ សូមកុំគិតបែបអវិជ្ជមានធ្វើអ្វី ផ្ទុយទៅវិញត្រូវតែមានសង្ឃឹមក្នុងចិត្តជានិច្ចថា អ្វីៗប្រាកដជាប្រសើរឡើង បូករួមជាមួយនឹងការខិតខំប្រឹងប្រែងយ៉ាងអស់ពីសមត្ថភាពក្នុងការធ្វើការងារនោះ។
៥) ទម្លាប់ជួយដល់អ្នកដទៃ
បើទោះបីជា មានភាពរវល់យ៉ាងណាក៏ដោយ តែអ្នកក៏គួរតែជួយសម្រួលការងារដល់បុគ្គលិកផ្សេងទៀតដែលជួបបញ្ហាពិបាកដោះស្រាយ។ ការជួយដល់អ្នកដទៃនេះ មិនត្រឹមតែពង្រឹងសាមគ្គីភាពជាមួយមនុស្សជុំវិញខ្លួនតែម្យ៉ាងទេ តែវាក៏ជួយឲ្យអ្នកមានអារម្មណ៍ថា សប្បាយចិត្តចំពោះទង្វើដែលខ្លួនបានធ្វើនៅកន្លែងធ្វើការផងដែរ។ ដូច្នេះហើយ កុំស្ទាក់ស្ទើរក្នុងការ ជួយដល់អ្នកដទៃ ប្រសិនបើមានលទ្ធភាពព្រោះ វាក៏ជាសេចក្តីសុខយ៉ាងសំខាន់៕
0 comments:
Post a Comment