បំណុលទាំងអស់មិនមែនសុទ្ធតែធ្វើឲ្យអ្នកអាចរកប្រាក់ចំណេញបានកាន់តែច្រើនជាងមុននោះឡើយ។ ហេតុដូច្នេះហើយវាជាចំណុចសំខាន់នៅទីនេះដែលប្រិយមិត្តគួរស្វែងយល់ពីភាពខុសគ្នារវាងបំណុលរស់ ឬ បំណុលល្អ (Good Debt) និង បំណុលងាប់ ឬ បំណុលខូច (Bad Debt) ឲ្យបានច្បាស់ជាមុនសិន មុននឹងសម្រេចចិត្តថា តើគួរធ្វើដូចម្តេចខ្លះចំពោះបំណុលទាំងពីរនេះ?
បំណុលរស់ ឬ បំណុលល្អ (Good Debt)
បំណុលដែលជាទូទៅត្រូវបានគេចាត់ទុកថា ជាបំណុលរស់ ឬ បំណុលល្អនោះ គឺជាបំណុលដែលជួយជ្រោមជ្រែងលោកអ្នកក្នុងការផ្តល់លទ្ធភាពប្រសើរជាងមុនសម្រាប់យកទៅវិនិយោគ ទិញអគារ ឬ អចលនទ្រព្យនានាជាដើម។ គេអាចនិយាយឲ្យងាយយល់ជាងនេះ គឺជាបំណុលដែលនាំមកនូវប្រាក់ចំណូលដល់អ្នកខ្ចី និង ជួយឲ្យអ្នកខ្ចីបានប្រាក់ចំណេញកាន់តែច្រើន។
ឧទាហរណ៍ថា លោកអ្នកបានខ្ចីប្រាក់មួយចំនួនដើម្បីទៅទិញលំនៅឋាន ឬ វិនិយោគលើវិស័យអចលនទ្រព្យ។ ការវិនិយោគលើវិស័យនេះត្រូវបានគេវាយតម្លៃថា តម្លៃនឹងកើនឡើងក្នុងរយៈពេលវែង។ នៅក្នុងករណីនេះ លោកអ្នកអាចមានលទ្ធភាពដោះបំណុលដែលបានជំពាក់យកមកវិនិយោគ ឬ ទិញផ្ទះបានតាមរយៈការយកប្រាក់ដែលបានទទួលពីថ្លៃជួលផ្ទះនោះទៅបង់រំលោះ។
បំណុលងាប់ ឬ បំណុលខូច (Bad Debt)
ផ្ទុយពីបំណុលរស់ បំណុលងាប់ ត្រូវបានគេផ្តល់និយមន័យថា ជាបំណុលដែលធ្វើឲ្យអ្នកខ្ចីយកទៅទិញ ឬ ចំណាយលើអចលនទ្រព្យទាំងឡាយណាដែលមានតម្លៃធ្លាក់ចុះជាលំដាប់។ អាចនិយាយបានម្យ៉ាងទៀតថា ជាបំណុលដែលមិនជួយបង្កើនរកប្រាក់ចំណូលបន្ថែម ឬ ខ្ចីប្រាក់យកទៅដោះបំណុលដែលមានស្រាប់។
ប្រាក់កម្ចីផ្ទាល់ខ្លួនសម្រាប់យកទៅទិញសម្ភារៈទំនើបៗ លំនៅឋានល្អៗ ហូបចុកតាមតែអំពើចិត្ត ដើរលេងកម្សាន្តចាយវាយមិនចំទិសដៅ ខ្ចីប្រាក់ពីកន្លែងមួយទៅដោះបំណុលកន្លែងមួយ គឺជាឧទាហរណ៍ដ៏ល្អជាកម្មវត្ថុនៃបំណុលងាប់ ឬ បំណុលខូចនេះ។
តើបំណុលងាប់អាចក្លាយជាបំណុលរស់ដែរឬទេ?
នៅត្រង់ចំណុចនេះមានការលើកឡើងផ្សេងៗគ្នាដោយអ្នកខ្លះនិយាយថា បំណុលងាប់អាចជួយឲ្យអ្នកជំពាក់បំណុលចេះគ្រប់គ្រងហិរញ្ញវត្ថុរបស់ខ្លួន និង កាន់តែជោគជ័យផ្នែកហិរញ្ញវត្ថុរបស់ខ្លួន។ ឧទាហរណ៍ថា ប្រសិនបើលោកអ្នកគោរព និង ព្យាយាមដោះបំណុលជារៀងរាល់ខែយ៉ាងទៀងទាត់បំផុត នោះមានន័យថាបំណុលដែលជំពាក់នឹងកាន់តែធ្លាក់ចុះបន្តិចម្តងៗ។ យ៉ាងណាមិញ បើលោកអ្នកចំណាយមានច្រើនជាងចំណូល ហើយបំណុលក៏មានទៀតនោះ នោះលោកអ្នកមិនអាចមានលទ្ធភាពដោះបំណុលបានឡើយ និង ច្បាស់ជាក្លាយជាទាសករបំណុលងើបមុខមិនរួចជាមិនខាន។
តើបំណុលរស់ ឬ បំណុលល្អអាចក្លាយជាបំណុលងាប់ដែរឬទេ?
ប្រើប្រាស់បំណុលរស់ទៅដោះបំណុលងាប់អាចធ្វើឲ្យអ្នកចំណាយពេលរាប់ឆ្នាំដើម្បីដោះវាឲ្យរួច។ ករណីនេះកើតមាននៅពេលបំណុលរស់ ត្រូវបានខ្ចីបន្ថែមលើបំណុលងាប់ដែលមានស្រាប់តាំងពីមុនមក។
ឧទាហរណ៍ថា លោកអ្នកបានខ្ចីប្រាក់ (បំណុលរស់)ពីធនាគារ ៣០០ ០០០ដុល្លារដើម្បីទៅទិញផ្ទះមួយល្វែង ខណៈទន្ទឹមនឹងគ្នានេះលោកអ្នកកំពុងជំពាក់បំណុលគេស្រាប់ (បំណុលងាប់) ប្រមាណ ១០ ០០០ដុល្លារ។ នេះនឹងធ្វើឲ្យអ្នកត្រូវរកប្រាក់មកបង់រំលោះកាន់តែច្រើនជាងមុន អាចនិយាយបានថា យកប្រាក់ចំណូលដែលបានពីការជួលផ្ទះមកដោះបំណុលចាស់ ១០ ០០០ដុល្លារផង និង មួយចំនួនទៀតទៅដោះបំណុលនៅធនាគារ ៣០០ ០០០ដុល្លារផង។
ស្ថានភាពនេះបានធ្វើឲ្យលោកអ្នកត្រូវទទួលខុសត្រូវដោះបំណុលចំនួនពីរកន្លែង និង អាចធ្វើឲ្យលោកអ្នកចំណាយពេលច្រើនជាងមុន ប្រសិនបើការរកចំណូលនោះមិនអាចទូទាត់អត្រាការប្រាក់ចេញពីបំណុលទាំងពីរបាន។
ហេតុដូច្នេះនេះ មុននឹងលោកអ្នកខ្ចីប្រាក់គួរតែពិចារណាលើអត្រាការប្រាក់កម្ចី និង ចំណូលដែលបានមក តើសមមូលនឹងគ្នាដែរឬអត់? បើអត្រាការប្រាក់មានចំនួនលើសពីប្រាក់ចំណូល លោកអ្នកត្រូវដកថយវិញ និងព្យាយាមដោះបំណុលចាស់ (បំណុលងាប់) នោះឲ្យរួចក្នុងអត្រាការប្រាក់ទាបជាមុនសិន មុននឹងសម្រេចចិត្តខ្ចីប្រាក់ (បំណុលរស់) វិនិយោគអ្វីផ្សេងទៀ៕
0 comments:
Post a Comment