លោក Rodney Anderson៖ ការបន្ទាបខ្លួន និង ភាពសុភាពរាបសារ គឺជាកូនសោតំណាងឲ្យភាពជោគជ័យ Businessinsider
«តើ CEO ក្រុមហ៊ុនមួយអាចហ៊ានអះអាងទេថា ខ្លួនពិតជាអាចធ្វើឲ្យក្រុមហ៊ុនរបស់ខ្លួនជោគជ័យដោយធ្វើការតែម្នាក់ឯងបាន? តាមចម្លើយរបស់ខ្ញុំនោះ គឺគ្មានឡើយនៅលើលោកយើងនេះ»។ នេះជាការលើកឡើងរបស់លោក Rodney Anderson ជាស្ថាបនិក និង នាយកប្រតិបត្តិភោជនីយដ្ឋាន Pancheros Mexican Grill ដ៏ធំបំផុតមួយរបស់អាមេរិក។
បង្កើតឡើងនៅក្នុងឆ្នាំ ១៩៩២ លោក Anderson បានបញ្ចប់ថ្នាក់បរិញ្ញាបត្រជាន់ខ្ពស់ផ្នែកគ្រប់គ្រងពាណិជ្ជកម្ម (MBA) ពីសាកលវិទ្យាល័យ Chicago និង ជាពេលដំបូងបំផុតក្នុងឆាកជីវិតរបស់លោកដែលបានក្លាយជាសហគ្រិនបោះដើមទុនបង្កើតភោជនីយដ្ឋានមួយនេះឡើងនៅក្រុង Iowa ក្នុងរដ្ឋ Lowa។
នៅក្នុងរយៈពេល២ ឬ ៣ ឆ្នាំដំបូង លោកបានបម្រើការងារសព្វគ្រប់បែបយ៉ាងទាំងអស់នៅក្នុងភោជនីយដ្ឋានរបស់លោករាប់ទាំងការងារលាងចាន ជួតតុ គិតលុយ បោសសំអាត និង ធ្វើចុងភៅជាដើមដើម្បីដកពិសោធន៍ថា តើភោជនីយដ្ឋានដ៏ល្អមួយត្រូវរៀបចំឡើងដោយរបៀបណា?
លោក Anderson បានបន្តថា សកម្មភាពនេះនឹងធ្វើឲ្យលោកយល់កាន់តែច្បាស់ពីស្ថានភាពក្រុមការងាររបស់លោកដែលបម្រើនៅក្នុងភោជនីយដ្ឋាននេះ និង ដើម្បីដឹងថា តើមុខរបររបស់លោកនៅមានចំណុចខ្វះខាតត្រង់ណាខ្លះដែលត្រូវកែលំអបន្ថែមទៀត? ដំណាក់កាលនេះហើយដែលម្ចាស់ភោជនីយដ្ឋានបម្រើមុខម្ហូបតាមបែបអាហារមិកស៊ិករូបនេះបញ្ជាក់ថា ការបន្ទាប់ខ្លួន និង ភាពសុភាពរាបសារគឺជាកូនសោចំនួនពីរមិនអាចខ្វះបានធ្វើឲ្យភោជនីយដ្ឋានរបស់លោកមានពន្លឺថ្ងៃរហូតមកដល់ថ្ងៃនេះ។
«ការធ្វើអាជីវកម្មលើវិស័យភោជនីយដ្ឋាន គឺមានសារសំខាន់ខ្លាំងណាស់ដើម្បីដឹង និង ស្វែងយល់ពីអ្វីដែលយើងធ្វើមិនអាចដូចការគិតរបស់យើងនោះឡើយ។ យើងបានផ្ដោតលើការផ្ដល់សេវាកម្ម និង ផលិតផលទាំងឡាយណាដែលជាតម្រូវការរបស់អតិថិជនទូទៅ»។ នេះជាប្រសាសន៍របស់លោក Anderson។
លោកបានបន្តដូច្នេះថា៖« វាប្រាកដណាស់ដែលថា ចំណុចតូចមួយសោះអាចធ្វើឲ្យផ្លាស់ប្ដូរអ្នកបាន នោះគឺសេវាកម្មល្អជូនអតិថិជន។ អ្នកត្រូវតែចេះបន្ទាប់ខ្លួនឲ្យបានល្អដើម្បីអនុវត្តហើយអនុវត្តទៀតនូវអ្វីដែលជាមូលដ្ឋាននាំឲ្យអ្នកជោគជ័យបាន ដូចជា ផ្ដល់អាហារដែលមានគុណភាព និង អនាម័យល្អ និង ការផ្ដល់សេវាកម្មយ៉ាងល្អផ្សេងទៀតដែលធ្វើឲ្យអតិថិជនសប្បាយចិត្ត»។
លោកបានបង្ហាញទស្សនៈផ្ទាល់ខ្លួនថា ក្នុងនាមជាអ្នកដឹកនាំម្នាក់ អ្នកត្រូវចេះបន្ទាប់ខ្លួនឲ្យបានល្អ មិនឆ្មើងឆ្មៃ ឬ វាយឫកដល់អ្នកណាម្នាក់ដែលនៅជុំវិញខ្លួននោះឡើយ។ « ចំណុចនេះ គួរតែផុសចេញពីបេះដូង CEO គ្រប់រូបដើម្បីភ្ជាប់បណ្ដាញទំនាក់ទំនងដ៏ល្អមួយទៅកាន់អតិថិជន បុគ្គលិក និងទៅកាន់គូប្រជែងរបស់ខ្លួនទៀតផង។ អ្នកត្រូវទទួលយកការរិះគន់ គំនិតស្ថាបនាពីគ្រប់ទិសទី ទើបអ្នកអាចកែលំអចំណុចខ្វះបានរបស់អ្នកបាន ហើយអាចបម្រើអតិថិជនកាន់តែល្អឡើង»។
ដោយកំពុងគ្រប់គ្រងភោជនីយដ្ឋាននេះដែលមានសាខារហូតដល់ ៦៥កន្លែងនៅទូទាំងទឹកដីអាមេរិក សហគ្រិនរូបនេះបានពន្យល់ថា៖« ការបន្ទាប់ខ្លួន និង ភាពសុភាពរាបសារបានធ្វើឲ្យអ្នកជោគជ័យដោយសារតែវាជួយបង្កើនទំនាក់ទំនងកាន់តែស្និទ្ធស្នាលជាមួយបុគ្គលិកគ្រប់រូប ជាពិសេសគឺបានជួយលើកទឹកចិត្តរវាងអ្នក និង ពួកគេឲ្យមានការពិភាក្សាគ្នាដោយបើកចំហមួយបាន»។
លោក Anderson បានពន្យល់ទៀតថា ភាពជោគជ័យភាគច្រើនកើតចេញពីចម្ងល់ជាច្រើន និង ស្វែងរកអ្នកណាម្នាក់ដែលមានសមត្ថភាពគ្រប់គ្រាន់អាចដោះស្រាយចម្ងល់ទាំងនោះបានយ៉ាងមានប្រសិទ្ធភាព។ ការរៀនសូត្រពីអ្នកដទៃដែលមិនភ័យខ្លាចទៅនឹងកំហុសដែលកើតមានឡើង និង ការប្តេជ្ញាចិត្តកែលំអចំណុចខ្វះខាតទាំងនោះ គឺជាគន្លឹះពិសេសដែលធ្វើឲ្យលោកជោគជ័យដោយមិនអាចប្រកែកបាន៕
0 comments:
Post a Comment