សិប្បកម្មខ្សែក្រវាត់កូនខ្មែរកែច្នៃពីឈើអាចរកចំណូលបានជាង ២០០០ដុល្លារអាមេរិកក្នុងមួយខែៗ និងបានផ្ដល់ការងារជូនកម្មករ ១០នាក់ ហើយបានផ្ដល់មូលនិធិរួមចំណែកក្នុងសកម្មភាពសប្បុរសធម៌ជួយដល់អ្នកទីទល់ក្រ និងអ្នកចាស់ជរានៅក្នុងសហគមន៍ថែមទៀតផង។
ម្ចាស់សិប្បកម្មខ្សែក្រវាត់កូនខ្មែរ លោក ម៉ៅ ជីមន ឱ្យថា សិប្បកម្មខ្សែក្រវាត់កូនខ្មែរបានបង្កើតឡើងរយៈពេលជាងពីរឆ្នាំមកហើយ ដោយបច្ចុប្បន្នមានកម្មករបម្រើការងារចំនួន ១០នាក់ដែលកម្មករភាគច្រើនជាអ្នកទីទាល់ក្រ និងជនពិការ ដែលគ្មានលទ្ធភាពប្រកបរបរផ្សេងៗដើម្បីរកប្រាក់ចំណូលចិញ្ចឹមជីវិតប្រចាំថ្ងៃបាន។ លោកបន្តថា ប្រាក់ខែ កម្មករម្នាក់ទទួលបានក្នុងមួយខែចាប់ពី ១២០ដុល្លារអាមេរិកទៅ ១៣០ដុល្លារអាមេរិក និងមានប្រាក់បន្ថែមសម្រាប់ការងារថ្ងៃអាទិត្យចំនួន ២៥ ០០០រៀល និងប្រាក់លើកទឹកចិត្ត សម្រាប់ថ្ងៃបុណ្យចំនួន ១០ដុល្លារផងដែរ។
លោកបន្ថែមទៀតថា ក្នុងមួយថ្ងៃសិប្បកម្មខ្សែក្រវាត់កូនខ្មែរ អាចផលិតបានចន្លោះពី ១០ទៅ ២០ខ្សែដោយតម្លៃលក់ក្នុងមួយខ្សែមាន ៣០ ដុល្លារ ៣៥ ដុល្លារនិង៥០ដុល្លារ ទៅតាមប្រភេទឈើដែលបានយកមកកែច្នៃជាមួយខ្សែលីឡុងតាន់ ឬខ្សែប្រាំងកង់ ហើយក្រៅពីការធ្វើលក់ខ្លួនឯង លោកក៏ស៊ីឈ្នួលធ្វើឱ្យគេផងដែរ ដោយ១ខ្សែលោកយកថ្លៃ ២០ដុល្លារអាមេរិក។
សិប្បកម្មកែច្នៃខ្សែក្រវាត់កូនខ្មែរ ក៏បានចូលរួមចំណែកក្នុងសកម្មភាពសប្បុរសធម៌ នៅក្នុងសង្គមផងដែរ ក្រៅពីប្រកបអាជីវកម្ម។ ម្ចាស់សិប្បកម្មបានថ្លែងដូច្នេះថា ៖« កូនជាងខ្ញុំរើសយកមកសុទ្ធតែជាអ្នកទីទាល់ទេ និងអ្នកដែលពិការ អ្នកដែលគេគ្រាន់បើ ខ្ញុំមិនរើសទេ ហើយខ្ញុំតាំងចិត្តខ្លួនឯងថា នៅពេលបានចំណូលពីការលក់ខ្សែក្រវាត់ ក្នុងមួយខ្សែខ្ញុំដក ១០០០រៀល ដើម្បីដាក់ចូលមូលនិធិជួយជនក្រីក្រ»។
លោក ម៉ៅ ជីមន ជាជាងឈើម្នាក់រស់នៅក្នុងភូមិពានា ឃុំអំពិលក្រៅ ស្រុកស៊ីធរកណ្ដាល ខេត្តព្រៃវៃង។ របៀបនៃការធ្វើខ្សែក្រវាត់នេះគឺលោកបានរៀនកែច្នៃដោយខ្លួនឯង ដោយមានការផ្ដល់យោបល់ពីចៅអធិការវត្តពានា និងកូនរបស់លោកដែលធ្វើការជាវិស្វករ។ តាមការបញ្ជាក់របស់លោកឱ្យដឹងថា សិប្បកម្មខ្សែក្រវាត់កូនខ្មែរនៅមានទ្រង់ទ្រាយតូចនៅឡើយ ហើយលោករំពឹងថា ប្រជាពលរដ្ឋខ្មែរនឹងជួយគាំទ្រផលិតផលខ្មែរដើម្បីឱ្យការផលិតកាន់តែរីកចំរើនថែមទៀត៕
0 comments:
Post a Comment