ម្ចាស់កាហ្វេចល័តចំនួនពីរ បានបញ្ចេញទស្សនៈដូចគ្នាថា ក្រុមហ៊ុនរបស់លោកមិនព្រួយបារម្ភទេ បើទោះបីជាអាជីវកម្មប្រភេទនេះកំពុងបង្កើត ដោយចម្លងតៗគ្នាច្រើនក្នុងរាជធានីភ្នំពេញយ៉ាងណាក្ដី។
ម្ចាស់ Mobile Coffee លោក យ៉ែម ឈីម បានឲ្យ TheBNWS ដឹងថា លោកមិនបារម្ភពីការកើនឡើងនៃអាជីវកម្មលក់កាហ្វេចល័តដែលមានការរៀបចំតុតែងស្រដៀងនឹងអាជីវកម្មរបស់លោកនោះទេ ព្រោះថាការព្យាយាមចម្លងតាមអ្វីដែល Mobile Coffee មាន រឹតតែធ្វើឲ្យក្រុមហ៊ុនលោកទទួលបានអតិថិជនច្រើនទៅវិញនោះទេ ដោយសារមានការវាស់ស្ទង់ពីកម្រិតរសជាតិ និងគុណភាព។
លោកបន្តថា អ្វីដែលធ្វើឲ្យ Mobile Coffee នៅតែទទួលបានអតិថិជនកើនឡើងច្រើន គឺដោយសារ Mobile Coffee ឈរលើគោលបីធំៗ ទី១ រសជាតិ និងគុណភាព ទី២ ការច្នៃប្រឌិត ទី៣ ទីកន្លែងលក់អំណោយផលល្អ។
ដោយឡែក ម្ចាស់ហាងកាហ្វេចល័ត HOPE CAFÉ លោក ខៀវ ណារ៉ុន បានបញ្ចេញនូវទស្សនៈដែរថា កាហ្វេចល័តតាមដងផ្លូវ ពិតជាមានការកើនឡើងច្រើនមែន ប៉ុន្តែលោកមិនមិនព្រួយបារម្ភពីការធ្លាក់ចុះអតិថិជនលោកនោះទេ ព្រោះអតិថិជនដែលតែងតែគាំទ្រលើរសជាតិកាហ្វេរបស់លោកកន្លងមកមិនថមថយទេ ផ្ទុយទៅវិញ រឹតតែកើនឡើងពីមួយថ្ងៃទៅមួយថ្ងៃ ដោយសារគុណភាពនៃរសជាតិ តម្លៃសមរម្យ និងសេវារហ័ស។
លោកបន្តថា HOPE CAFÉ ប្រើពាក្យស្លោកថា «ជម្រើសល្អសម្រាប់សុខភាព! យើងតែងតែគិតដល់សុខភាពលោកអ្នក!» ផ្សារភ្ជាប់នឹងពាក្យស្លោកខាងលើនេះ ទើបអតិថិជនរឹតតែមានជំនឿចិត្តបន្ថែម បន្ទាប់ពីទទួលទានហើយ គាត់យល់ថា គឺពិតជាកាហ្វេធម្មជាតិពិតប្រាកដមែន។
កាហេ្វចល័តបែបទំនើប នៅរាជធានីភ្នំពេញ ត្រូវបានបង្កើតឡើងកាលពីឆ្នាំ២០១៤ ហើយបានចាប់ផ្ដើមនិយមខ្លាំង នាំឱ្យមានយីហោផ្សេងៗបង្កើតឡើងតៗគ្នា។ ទោះជាយ៉ាងណា គេមើលឃើញថា កាហ្វេចល័តទទួលបានការចាប់អារម្មណ៍ច្រើនគួរសមពីសំណាក់អ្នករស់នៅភ្នំពេញ៕
0 comments:
Post a Comment