តើប្រិយមិត្តមានអារម្មណ៍ថា បន្ទប់ធ្វើការរបស់លោកអ្នកតូចចង្អៀត គ្មានផាសុកភាព គ្មានការលើកទឹកចិត្ត រួមទាំង ភាពឯកោជាដើមដែរឬទេ? បើពិតជាមានមែននោះ វាជារឿងមួយគ្រោះថ្នាក់ប៉ះពាល់ធ្ងន់ធ្ងរដល់លទ្ធផលការងារជាមិនខាន។ ដូច្នេះ សូមងាកមកមើលបន្ទប់ការងារដែលប្រកបដោយថាមពលវិញម្តងថា តើមានចំណុចពិសេសអ្វីខ្លះ?
១) បន្ទប់ធ្វើការធំទូលាយ
បន្ទប់ធ្វើការដែលមានលក្ខណៈធំទូលាយមិនចង្អៀត មានរបៀបរៀបរយ នេះគឺជាសមាសធាតុដ៏សំខាន់ជំរុញឲ្យការរបស់អ្នករលូនបាន។ កន្លែងធំទូលាយនេះអាចធ្វើឲ្យអ្នកមានអារម្មណ៍ស្រស់ស្រាយ និង អាចបម្លាស់ទីដោយមិនទាស់ចិត្តនៅពេលមានការប្រាស្រ័យទំនាក់ទំនងជាមួយក្រុមការងារជាដើម។
២) មានពន្លឺភ្លើងគ្រប់គ្រាន់
បន្ទប់ធ្វើការរបស់អ្នកគួរតែពិតានខ្ពស់ ដាក់ពន្លឺភ្លើងបានល្អមិនខ្សោយពេក ឬ ខ្លាំងពេកដើម្បីឲ្យប្រាកដថា បុគ្គលិកគ្រប់រូបអាចធ្វើការដោយពេញភ្នែកបាន។ អំពូលភ្លើងគួរតែមានប្រព័ន្ធត្រួតពិនិត្យបានល្អដែលអាចដំឡើង និង បន្ថយពន្លឺបានស្របតាមតម្រូវការ។
៣) បន្ទប់មានពណ៌ចម្រុះគ្នា
បុគ្គលិកគ្រប់រូបទំនងមិនចូលចិត្តពណ៌ដូចគ្នានោះទេ ដូច្នេះបើបន្ទប់របស់មានតែពណ៌ស តែអវត្តមានពណ៌លឿង ឬ ពណ៌ខៀវ និង ពណ៌បៃតងជាដើមមើលទៅវាហាក់ដូចជាគ្មានសិល្បៈមួយនៅកន្លែងការងារសោះ។ យ៉ាងណាមិញ បើសម្ភារការិយាល័យ មានដូចជា កៅអី តុ សម្ភារៈប្រើប្រាស់ ជាពិសេសជញ្ជាំងមានពណ៌ស្រស់ស្អាតឆើតឆាយយ៉ាងទាក់ទាញនោះ វាបន្ថែមរសជាតិការងារបានមួយកម្រិតទៀតផងដែរ។
៤) បន្ទប់មានដាក់តាំងរូបសិល្បៈ ឬ ដាំកូនរុក្ខជាតិតូចៗ
រូបសិល្បៈផ្សេងៗមានដូចជា រូបភាព វត្ថុអនុស្សាវរីយ កូនរុក្ខជាតិជាដើម គឺជាអ្វីដែលបន្ទប់ធ្វើការរបស់លោកអ្នកត្រូវដាក់បន្ថែមព្រោះថា វាអាចបង្ហាញពីភាពទាក់ទាញ ជាពិសេសធ្វើឲ្យបុគ្គលិកគ្រប់រូបមានអារម្មណ៍ស្រស់ស្រាយដូចធ្វើការនៅកន្លែងធម្មជាតិដូច្នេះដែរ។
៥) អ្នកគ្រប់គ្រងចែករំលែកការងារបានគ្រប់ជ្រុងជ្រោយ
នៅកន្លែងការងាររបស់អ្នក បើអ្នកសង្កេតឃើញថា អ្នកគ្រប់គ្រងមានភាពស្និទ្ធស្នាលទៅវិញទៅមកជាមួយបុគ្គលិក និង ចែករំលែកការងារដល់បុគ្គលិកប្រកបដោយទំនុកចិត្ត នេះនឹងរួមចំណែកដ៏សំខាន់ដល់ប្រសិទ្ធភាពការងារ។ ផ្ទុយទៅវិញបើអ្នកគ្រប់គ្រងមិនទុកចិត្តអ្នក ដកការងារពីអ្នកហើយនោះ នេះអាចបញ្ជាក់ថា ជាសញ្ញាណមិនល្អពិបាកធ្វើឲ្យអ្នកមានឱកាសអភិវឌ្ឍសមត្ថភាពការងាររបស់អ្នកណាស់។
៦) ធ្វើការងារជាក្រុមបានល្អ
នៅកន្លែងការងារ ការធ្វើការជាក្រុមពិតជាមិនអាចខ្វះបានឡើយ ដើម្បីសម្រេចគោលដៅរួមមួយរបស់ក្រុមហ៊ុន។ ហេតុដូច្នេះ បើអ្នកសង្កេតឃើញថា កន្លែងការងាររបស់អ្នកមានភាពសហការគ្នាល្អលើការអនុវត្តគម្រោងនានា នោះពិតជាសញ្ញាណល្អហើយដែលជាផ្នែកមួយដ៏សំខាន់សម្រាប់គុណភាពការងារ។
៧) មានការលើកទឹកចិត្តខ្ពស់
វាជារឿងមួយគ្រោះថ្នាក់ បើអ្នករកឃើញថា កន្លែងការងាររបស់អ្នកគ្មានការលើកទឹកចិត្ត ចូលចិត្តប៉ែងជើងគ្នាជាដើម។ អ្នកគ្រប់គ្រងដើរតួនាទីសំខាន់នៅក្នុងករណីនេះដើម្បីធានាថា បុគ្គលិកគ្រប់រូបត្រូវបានលើកទឹកចិត្តដោយស្មើភាព គ្មានការរើសអើងនោះឡើយ។
៨) បានដឹងពីរបៀបវារៈមុនពេលប្រជុំ
រាល់កិច្ចប្រជុំការងាររបស់អ្នក អ្នកត្រូវដឹងថា តើកិច្ចប្រជុំនោះនិយាយពីអ្វី? ធ្វើឡើងនៅពេលណា? អ្នកណាខ្លះចូលរួម? បើអ្នកបានជ្រាបដឹងពីចំណុចទាំងនេះមុនកិច្ចប្រជុំធ្វើឡើង វាស្ថិតនៅក្នុងចំណាត់ថ្នាក់បរិស្ថានការងារមួយដ៏ល្អសម្រាប់អ្នកហើយ៕
0 comments:
Post a Comment