១) រៀបចំបញ្ជីចំណូលចំណាយឡើងវិញ
អ្នកពិតជាមិនអាចគ្រប់គ្រងហិរញ្ញវត្ថុដែលចាយវាយគ្មានទិសដៅបាននោះទេ ហេតុដូច្នេះហើយជំហានដំបូងនៅទីនេះទាមទារឲ្យអ្នកចេះគ្រប់គ្រងហិរញ្ញវត្ថុពោល គឺចំណូល និង ចំណាយឲ្យបានត្រឹមត្រូវ និងដឹងថា តើហិរញ្ញវត្ថុរបស់អ្នកត្រូវចំណាយទៅលើអ្វីខ្លះ? នៅពេលដែលអ្នកដឹងពីហិរញ្ញវត្ថុរបស់អ្នកច្បាស់លាស់ អ្នកនឹងអាចកំណត់បានពីចំណុចខ្វះខាត និង ដំណោះស្រាយងាយៗមួយចំនួនទប់ទល់ទៅនឹងការចំណាយដែលគ្មានទិសដៅទាំងនោះ។
២) កាត់បន្ថយការចំណាយ
អ្នកអាចសម្លឹងជុំវិញអ្នកថា តើអ្នកបានចំណាយលើអ្វីខ្លះច្រើនជាងគេ? តើអ្វីទៅដែលធ្វើឲ្យអ្នកចំណាយច្រើនជាងគេបំផុត? ការចំណាយលើការហូបចុកតាមអំពើចិត្ត ស្លៀកពាក់ សម្ភារៈទំនើបៗ អគ្គិសនី កម្មវិធីជួបជុំ និង សម្ភារៈផ្សេងៗទៀតបើមានច្រើនហួសហេតុពេកនោះ អ្នកគួរកំណត់មកត្រឹមចំនួនមួយសមល្មមបានហើយក្នុងចំនួនមួយតិចជាងចំណូលរបស់អ្នក។
៣) ចំណាយលើខ្លួនអ្នកសិន មុនចំណាយឲ្យអ្នកដទៃ
អ្នកប្រហែលជាមិនមានហិរញ្ញវត្ថុគ្រប់គ្រាន់សម្រាប់ចេញថ្លៃឲ្យមនុស្សនៅជុំវិញខ្លួនអ្នកទាំងអស់នោះទេ ហើយក៏មិនមែនចេះតែចេញថ្លៃឲ្យដោយឥតប្រយោជន៍នោះទេ។ ម្ល៉ោះហើយបើដឹងថា ខ្លួនអ្នកគ្មានលទ្ធភាពលើរឿងនេះទេនោះ គួរគិតពីតម្រូវការខ្លួនអ្នកជាមុនសិន មុននឹងជួយអ្នកដទៃ។ ប៉ុន្តែ បើមើលឃើញថា បុគ្គលណាម្នាក់អាចជួយឲ្យអ្នកជោគជ័យបាន ជួយចេញថ្លៃខ្លះៗក៏គ្មានអ្វីខាតបង់ដែរ។
៤) កំណត់ឲ្យបានច្បាស់ពីនិយមន័យទ្រព្យសម្បត្តិ
នៅក្នុងវចនានុក្រម ទ្រព្យសម្បត្តិគឺជាចំនួនទឹកប្រាក់ និង ការកាន់កាប់ទ្រព្យសម្បត្តិក្នុងចំនួនដ៏ច្រើនសន្ធឹកសន្ធាប់។ យ៉ាងណាមិញ បើអ្នកសួរអ្នកណាម្នាក់ពីរឿងនេះ អ្នកនឹងទទួលបានចម្លើយផ្សេងៗគ្នាជាមិនខាន។ ករណីនេះ មានមហាសេដ្ឋីជាច្រើនបាននិយាយថា សេរីភាព គោលបំណង គ្រួសារ សុខភាព បទពិសោធន៍ សុភមង្គល ជាដើម គឺមានតម្លៃជាងលុយទៅទៀត។ តាមពិតទៅ លុយមិនអាចទិញរបស់ទាំងនេះបានដោយភ្លាមៗនោះទេ តែវាអាចជួយបង្កលក្ខណៈងាយស្រួលឲ្យអ្នកបង្កើតចំណុចទាំងនេះបាន។
៥) ព្យាយាមសន្សំលុយតាមតែអាចធ្វើទៅបាន
បើទោះបីជា អ្នកអាចរកចំណូលបានច្រើនក្នុងមួយខែៗ ប៉ុន្តែប្រសិន មិនសន្សំវាឲ្យបានល្អទេ អ្នកគ្មានថ្ងៃអាច សល់លុយច្រើនបានឡើយ។ មិនត្រឹមប៉ុណ្ណោះ វាក៏ធ្វើឲ្យអ្នកខ្វះខាតលុយ នៅពេលដែលត្រូវការចំណាយលើអ្វីសំខាន់ក្នុងពេលណាមួយមិនខាន។ ដូច្នេះហើយ គួរតែព្យាយាមគិតគូរសន្សំសំចៃ មុនពេលបញ្ហាធ្ងន់ធ្ងរកើតឡើង។
៦) រកប្រាក់ចំណូលបន្ថែម
បើទោះបីជា នាពេលបច្ចុប្បន្ននេះ ប្រាក់ចំណូលរបស់អ្នកច្រើនគួរសមហើយក៏ដោយ តែត្រូវតែព្យាយាមធ្វើយ៉ាងណាឲ្យប្រាក់ចំណូលទាំងនោះ កើនឡើងកាន់តែច្រើនថែមទៀត។ បើអ្នកមិនខិតខំរិះរកវិធី ដើម្បី បង្កើតប្រាក់ចំណូលឲ្យបានច្រើននោះទេ វាពិតជាពិបាកសម្រាប់ការក្លាយទៅជាអ្នកមាន។ ដូច្នេះ ត្រូវចាប់ឱកាស ហើយប្រសិនបើមិនមានឱកាស គឺត្រូវតែចេះបង្កើតឱកាសដោយខ្លួនឯង ដើម្បី អាចមានប្រាក់ចំណូលច្រើនឡើងៗ។
៧) សងបំណុលឲ្យទាន់ពេលវេលា
ការជំពាក់បំណុល គេមិនមែនជារឿងល្អប៉ុន្មាននោះទេ តែវាក៏មិនអាចជៀសរួចនោះទេ ក្នុងឆាកជីវិតមនុស្សម្នាក់ៗ ជាពិសេសសម្រាប់អ្នកដែលត្រូវការធ្វើជំនួញ។ យ៉ាងណាក៏ដោយ ក្នុងស្ថានភាពនេះ អ្នកត្រូវតែខិតខំឲ្យបានខ្លាំងបំផុត ដើម្បីធ្វើឲ្យបំណុលនេះ ផ្តល់ផលប្រយោជន៍លើមុខជំនាញ ហើយដើម្បីមានលទ្ធភាពសងបំណុលវិញទៅតាមកាលកំណត់។ បញ្ហាកាន់តែធ្ងន់ធ្ងរ ប្រសិនបើ អ្នកគ្មានលទ្ធភាពសងបំណុលគេវិញទៅតាមពេលវេលាកំណត់ ។
៨) ប្រើពេលវេលាឲ្យមានប្រយោជន៍បំផុត
ពេលវេលា គឺសំខាន់ខ្លាំងណាស់ ហើយម្នាក់ៗសុទ្ធតែមាន ២៤ ម៉ោងដូចគ្នាដើម្បីធ្វើកិច្ចការផ្សេងៗក្នុងមួយថ្ងៃ។ ដោយសារតែ ពេលវេលាសំខាន់បែបនេះហើយ អ្នកត្រូវតែប្រើពេលវេលាឲ្យមានប្រយោជន៍បំផុត ដើម្បីធ្វើអ្វីដែលចាំបាច់។ សូមកុំទុកពេលវេលាឲ្យ កន្លងផុតទៅដោយគ្មានន័យឲ្យសោះ ព្រោះថា ពីមួយថ្ងៃទៅមួយថ្ងៃ ពេលវេលាដើរទៅមុខជានិច្ច ដូច្នេះបើអ្នកមិនចេះប្រើវាឲ្យមានប្រយោជន៍នោះ ទេ ប្រាកដណាស់ថា វិប្បដិសារី និង កើតឡើងជាមិនខាន ហើយអ្នកពិតជាគ្មានថ្ងៃអាចក្លាយជាអ្នកមាននាពេលអនាគតបានឡើយ។
៩) បង្កើនទំនាក់ទំនងជាមួយបុគ្គលជោគជ័យហិរញ្ញវត្ថុ
បើទោះបីជា អ្នកមានចំណេះដឹងច្រើនប៉ុណ្ណាក៏ដោយ ប៉ុន្តែបើខ្វះការប្រាស្រ័យទាក់ទងក្នុងសង្គមហើយ ពិតជាមានការលំបាកក្នុងការធ្វើកិច្ចការផ្សេង។ ការបង្កើតបណ្ដាញជាមួយបុគ្គលជោគជ័យហិរញ្ញវត្ថុ គឺជាចំណុចដ៏ល្អបំផុតក្នុងសម័យបច្ចុប្បន្ន ព្រោះថាអ្នកអាចទទួលបានចំណេះដឹងថ្មីៗពីការរកលុយ និងមានឱកាសច្រើនក្នុងការបង្កើនប្រាក់ចំណូល ឬ រកលុយបានច្រើនជាងមុន។
១០) សន្សំប្រាក់ដើម្បីវិនិយោគ
នេះជាគុណសម្បត្តិពិសេសមួយទៀតបើអ្នកស្ថិតនៅក្នុងចំណោមមនុស្ស ដែលចូលចិត្តសន្សំប្រាក់ ទុក សម្រាប់ការពារនៅពេលមានតម្រូវការចាំបាច់ ឬ យកទៅវិនិយោគដើម្បីបង្កើតចំណូលបន្ថែម។ វាជាវិធីសាស្ត្រដ៏ល្អមួយដែលក្រុមអ្នកមានប្រាក់ និង មហាសេដ្ឋីបានធ្វើគ្រប់ៗគ្នាដូចអ្វីដែលអ្នកកំពុងធ្វើ។
១១) បង្កើត និង ដើរទៅរកគោលដៅដែលបានកំណត់
នេះជាចំណុចមួយដែលអ្នកត្រូវរៀនអង្កេតពីខ្លួនឯងថា តើអ្នកជាមនុស្សម្នាក់ដែលបានបង្កើតគោលដៅពិតប្រាកដមួយសម្រាប់ ខ្លួនឯងហើយឬនៅ? តើអ្នកកំពុងតែធ្វើដំណើរទៅរកគោលដៅនោះដែរឬទេ? បើចម្លើយជាវិជ្ជមាននោះ មានន័យថា អ្នកនឹងមានឱកាសក្លាយជាអ្នកមាន ត្បិតអីក្រុមមហាសេដ្ឋីក៏ប្រកាន់គោលការណ៍បែបនេះដែរ៕
0 comments:
Post a Comment