លោក Larry Ellison ស្ថាបនិកក្រុមហ៊ុន Oracle
លោក Larry Ellison ជាសហគ្រិនសញ្ជាតិ អាមេរិក សព្វថ្ងៃលោកជាអ្នកជំនួញ និងថែមទាំងជាសប្បុរសជនមួយរូបផងដែរ។ មកដល់ចុងឆ្នាំ ២០១៥ នេះលោក Larry Ellison បានរក្សាចំណាត់របស់ខ្លួនក្នុងចំណាត់ថ្នាក់លេខ ៥ ជាមហាសេដ្ឋីមានជាងគេលើពិភពលោកជាមួយទ្រព្យសម្បត្តិ ៥៤,៣ ពាន់លានដុល្លារនេះបើយោងតាមទស្សនាវដ្ដី Forbes។ បន្ថែមលើសពីនេះលោកក៏ជាបម្រើការងារជានាយកប្រតិបត្តិ និង ប្រធានគ្រប់គ្រងខាងផ្នែកបច្ចេកវិទ្យានៅក្រុមហ៊ុន Oracle Corporation ផងដែរ។ ដូច្នេះតើមហាសេដ្ឋីចំណាត់ថ្នាក់លេខ ៥ ពិភពលោករូបនេះមានប្រវត្តិ និង បទពិសោធន៍អ្វីខ្លះក្នុងជីវិត ទើបធ្វើឲ្យលោកក្លាយជាមហាសេដ្ឋីលំដាប់ពិភពលោកដូច្នេះ?
លោក Larry Ellison ដែលមានឈ្មោះពេញថា Lawrence Joseph Larry Ellison កើតនៅថ្ងៃទី ១៧ សីហា ឆ្នាំ ១៩៤៤ ក្នុងទីក្រុង New York City ឪពុករបស់លោកមានសញ្ជាតិ អាមេរិក កាត់ អ៊ីតាលី។ បន្ទាប់ពីលោក Larry Ellison មានជំងឺរលាកសួតនៅអាយុ ៩ ខែ ម្តាយរបស់លោកបានយករូបលោកទៅប្រគល់ឲ្យ ពូ និង មីងរបស់លោក Larry Ellison ជាអ្នកមើលថែនិងក្រោយមក លោក Larry Ellison បានប្តូរទីលំនៅទៅរស់នៅភាគខាងត្បូងទីក្រុង Chicago។
បន្ទាប់ពីបញ្ចប់ថ្នាក់វិទ្យាល័យ លោក Larry Ellison បានចូលរៀនក្នុងសាកលវិទ្យាល័យ University of Illinois ក្នុងឆ្នាំ ១៩៦២ ដែលនៅឆ្នាំ ដំបូងនោះលោកបានជាប់ឈ្មោះជាសិស្សឆ្នើមផ្នែកវិទ្យាសាស្ត្រ។ មកដល់ឆ្នាំទី២ ម្តាយចិញ្ចឹមរបស់លោកបានទទួលមរណភាព ហើយលោក Larry Ellison ក៏បានសម្រេចចិត្តបោះបង់ចោលការសិក្សា។ ក្រោយពីបានបោះបង់ការសិក្សាលោក Larry Ellison បានធ្វើដំណើរទៅកានទីក្រុង Berkeley រដ្ឋ California រួមជាមួយនិងលុយតិចតួចប៉ុណ្ណោះ ដោយលោកបានចូលរៀនក្នុងសាកលវិទ្យាល័យ University of Chicago បានតែមួយឆមាសប៉ុណ្ណោះលើមុខវិទ្យាកុំព្យូទ័រ ឌីហ្សាញ។
ក្នុងអំឡុងពេលរស់នៅក្នុងរដ្ឋ California លោក Larry Ellison បានបម្រើការងារក្នុងក្រុមហ៊ុនមួយចំនួនដូចជា Wells Fargo និង Amdahl Corporation ជាដើម។ ដោយមានចំណេះដឹងខ្លះពីសាកលវិទ្យាល័យ រួមជាមួយបទពិសោធន៍ធ្វើការទៀតនោះលោក Larry Ellison ចាប់ផ្តើមរៀនសរសេរកម្មវិធីពេលកំពុងធ្វើការឲ្យក្រុមហ៊ុន Amdahl Corporation ដោយពេលនោះលោកបានធ្វើការសរសេរកម្មវិធីដំបូងឲ្យក្រុមហ៊ុន IBM។
មកដល់ឆ្នាំ ១៩៧៧ លោក Larry Ellison និងមិត្តរួមការងារពីររូបទៀតនៅ Amdahl Corporation បានសហការគ្នាបង្កើត កន្លែងសរសេរកម្មវិធីមួយមានឈ្មោះថា Software Development Labs ដោយពេលនោះលោកបានសរសេរកម្មវិធីបង្កើតប្រព័ន្ធគ្រប់គ្រងទិន្នន័យដោយលោកបានដាក់ឈ្មោះថា កម្មវិធីនោះថា Oracle ឲ្យទៅខាងទីភ្នាក់ងារស៊ើបការណ៍សម្ងាត់អាមេរិក CIA។ ក្រុមហ៊ុន របស់លោកនៅពេលនោះមានមនុស្សធ្វើការតិចជាង ១០ នាក់ ហើយប្រាក់ចំណូលប្រចាំឆ្នាំគឺតិចជាង ១ លានដុល្លារ។
ប៉ុន្តែមកដល់ឆ្នាំ ១៩៨១ ក្រុមហ៊ុន IBM បានចុះកិច្ចសន្យាប្រើប្រាស់កម្មវិធី Oracle ដែលធ្វើឲ្យក្រុមហ៊ុនបង្កើនការលក់កម្មវិធីទ្វេមួយជាពីរជារៀងរាល់ឆ្នាំ ក្នុងរយៈពេល ៧ ឆ្នាំជាប់គ្នា ហើយលោក Larry Ellison បានធ្វើការប្តូរឈ្មោះក្រុមហ៊ុនភ្លាមៗមកជាក្រុមហ៊ុន Oracle បន្ទាប់ពីទទួលបានការគាំទ្រខ្លាំង។ ភាពជោគជ័យបានបន្តកើតមានឡើងឥតឈប់ឈរ បានធ្វើឲ្យលោក Larry Ellison ក្លាយជាម្ចាស់ភាគហ៊ុនធំជាងគេរបស់ក្រុមហ៊ុន និងបានក្លាយខ្លួនជាមហាសេដ្ឋីម្នាក់នៅលើពិភពលោក។មកទល់នឹងពេលបច្ចុប្បន្ន តម្លៃរបស់ក្រុមហ៊ុន Oracle ទាំងមូលមានតម្លៃច្រើនជាង ១៨៥ ពាន់លានដុល្លារ ជាមួយនឹងបុគ្គលិកច្រើនជាង ៤០ ០០០ នាក់ដែលកំពុងបម្រើការងារ។
0 comments:
Post a Comment