អ្នកមានជំនាញលក់ហើយ តែអាជីវកម្មលក់មិនសូវដាច់មកពីមូលហេតុអ្វី? abilityshow
ការអភិវឌ្ឍជំនាញដ៏ត្រឹមត្រូវមួយក្នុងអាជីវកម្ម និង ការរៀនសូត្រពីភាពបរាជ័យនានា ត្រូវបានគេមើលឃើញថា អាចធ្វើឲ្យអាជីវកម្មនោះកាន់តែរឹងមាំឡើង។ ជំនាញលក់ក្នុងចំណោមជំនាញសំខាន់ៗផ្សេងៗទៀត គឺជាជំនាញពិសេសមិនអាចខ្វះបានសម្រាប់ធ្វើអាជីវកម្ម ដែលសហគ្រិនទូទៅត្រូវមានជាដាច់ខាត។ ប៉ុន្តែបើអ្នកមានជំនាញនេះហើយ ហើយអាជីវកម្មរបស់អ្នកនៅតែលក់មិនសូវដាច់ តើបណ្តាលមកពីមូលហេតុអ្វី? ហេតុផលនោះច្បាស់ជាមាន ដែលវាទំនងសហគ្រិនភាគច្រើនបានមើលរំលងទៀតផង។ TheBNEWS សូមបង្ហាញប្រិយមិត្តពីកំហុសនៃការលក់ចំនួន៤ ខាងក្រោមនេះ៖
១) អ្នកជាអ្នកលក់មិនផ្តល់ភាពកក់ក្តៅដល់អតិថិជន
សូមអ្នកស្រមៃបន្តិចមើល៍ថា បើអ្នកជាអ្នកលក់រអ៊ូរទាំច្រើន មិនស្វាគមន៍ដោយរីករាយ ឬ ចូលចិត្តដំឡើងមុខយក្សដល់អតិថិជននៅពេលដែលពួកគេត្រូវការជំនួញពីអ្នក តើមានអ្នកណាម្នាក់មកទិញផលិតផលរបស់អ្នក? បើអ្នកនៅតែរឹងទទឹងប្រកាន់គោលការណ៍បែបនេះមិនខ្វាយខ្វល់ ឬ យកចិត្តទុកដាក់ពីតម្រូវការអតិថិជនប្រៀបដូចជាស្តេចទេនោះ អាជីវកម្មរបស់អ្នកនឹងអាចបះជើងជាមិនខាន។ សូមចាំថា អ្នកលក់ នឹងអ្នកទិញប្រៀបបានដូចធ្មេញនឹងអណ្តាត បើអ្នកចេះញញឹមញញែមបន្តិចនិយាយស្វាគមន៍ទៅកាន់អតិថិជនដោយភាពកក់ក្តៅយ៉ាងរីករាយរាក់ទាក់ ទោះបីជាពួកគេបានទិញ ឬ មិនបានទិញផលិតផលរបស់អ្នកក៏ដោយ ក៏រូបភាពល្អៗទាំងនេះនៅដកជាប់ក្នុងចិត្តរបស់ពួកគេជាមិនខាន។
២) ចេះតែលក់មួយមុខ តែគ្មានដំណោះស្រាយជូនអតិថិជន
ក្នុងអាជីវកម្ម យុទ្ធសាស្ត្របញ្ចេញផលិតផល ឬ សេវាកម្មលក់ទៅកាន់ទីផ្សារកាន់តែច្រើន មិនមែនមានន័យថា ជួយឲ្យអាជីវកម្មរបស់អ្នកជោគជ័យនោះឡើយ ។ វាជារឿងល្អដែលផលិតផល ឬសេវាកម្មរបស់អ្នកមានទីផ្សារខ្ពស់ ប៉ុន្តែបើអ្នកគ្មានដំណោះស្រាយរាល់បញ្ហានានាជូនអតិថិជនទេនោះ មិនខុសអ្វីដាក់ត្រីក្នុងកញ្ជើធ្លុះនោះទេ។ ជាឧទាហរណ៍ក្រុមហ៊ុនទូរស័ព្ទ Apple បានស្រាវជ្រាវរកបច្ចេកវិទ្យាថ្មីៗជាច្រើន និង ធ្វើឲ្យផលិតផលរបស់ខ្លួនកាន់តែទំនើបជាងមុនបង្កភាពងាយស្រួលដល់អតិថិជន រហូតទទួលបានការគាំទ្រគ្រប់ទិសទី។ អាជីវកម្មរបស់អ្នកអាចរៀនសូត្រពីក្រុមហ៊ុននេះបាន។
៣) គិតតែចង់យកឈ្នះគូប្រកួតហួសហេតុពេក
តើអ្នកមានបានគិតទៅលើស៊ុតមាសនៅក្នុងអាជីវកម្មរបស់អ្នកដែរឬទេ? ស៊ុតមាសនៅពេលនេះសំដៅទៅលើអ្វីមួយដែលជាសក្ដានុពលធ្វើឲ្យអ្នកអាចយកឈ្នះគូប្រជែងបាន។ មានពេលខ្លះគូប្រជែងរបស់អ្នកអាចដកថយពីការប្រកួត ហើយងាកមកស្វែងរកចំណុចពិសេសមួយដែលល្អជាងអ្នក។ នោះគឺ បច្ចេកទេសលកផលិតផលនោះឯង។
ការលក់ឲ្យបានច្រើនគឺជារឿងមួយទៅហើយ តែការលក់ឲ្យបានចំៗទៅកាន់អតិថិជនយ៉ាងមានប្រសិទ្ធភាពដែលអ្នកយល់មានសក្ដានុពលនាំចំណូលគ្រាក់ៗមកឲ្យអ្នកគឺជារឿងសំខាន់មួយទៀត។ នៅក្នុងសង្គ្រាមអាជីវកម្ម អ្នកមិនត្រូវផ្ដោតត្រឹមតែយកឈ្នះគូប្រជែងមួយមុខដោយបញ្ចេញផលិតផលឲ្យបានច្រើននោះទេ តែយុត្តិសាស្ត្រ ឬ បច្ចេកទេសលក់ផ្សេងៗទៀតដែលនាំប្រាក់ចំណូលបានច្រើន គឺជាអ្វីដែលអ្នកយកចិត្តទុកដាក់ មិនចាំបាច់ខ្វាយខ្វល់ច្រើនលើគូប្រជែងរបស់អ្នកឡើយ។
៤) និយាយរឿងរ៉ាវអវិជ្ជមានពីគូប្រជែងរបស់អ្នក
វាជារឿងមួយងាយស្រួលដើម្បីប្រាប់ទៅសាធារណជននានា ជាពិសេសអតិថិជនរបស់អ្នកថា គូប្រជែងរបស់អ្នកផ្តល់ផលិតផល ឬ សេវាកម្មមិនល្អ លក់ក្នុងតម្លៃថ្លៃ និង គ្មានគុណភាពជាដើម។ នេះជាសញ្ញាណមិនល្អមួយប្រៀបដូចជាការយកសាំងមកជះលើភ្លើងកំពុងតែឆេះ។ អ្នកសាកគិតទៅមើល៍ថា តើមនុស្សភាគច្រើនចង់រកស៊ីជាមួយមនុស្សដែលមានគំនិតអវិជ្ជមានពីអ្នកដទៃដែរឬទេ? បើអ្នកបានត្រឹមតែអួតសរសើរផលិតផល ឬ សេវាកម្មរបស់ខ្លួន ហើយមិនយល់អ្វីដែលជាតម្រូវការពិតប្រាកដរបស់អតិថិជនដូចជាដំណោះស្រាយជូនពួកគេទេនោះ សម្ដីដែលចេញពីមាត់របស់អ្នកគ្រាន់តែជាភូតកុហកស្រស់ៗតែប៉ុណ្ណោះ។
ការពិតវាគឺបែបនេះឯង ពោលគឺថា បើអ្នកស្វែងរកដំណោះស្រាយជូនអតិថិជនឲ្យខ្ពស់ជាងដៃគូប្រជែងរបស់អ្នកដោយមិនគិតតែពីលុយៗមួយមុខ វាជាសញ្ញាណដ៏ល្អមួយកាន់តែបង្កើតទំនុកចិត្តជាមួយនឹងពួកគេ។ សូមកុំភ្លេចថា ទំនាក់ទំនងជិតស្និទ្ធជាឯកជនទៅនឹងអតិថិជនម្នាក់ៗ មានចំណែកសំខាន់ណាស់សម្រាប់ដង្ហើមអាជីវកម្មរបស់អ្នក។ បើអ្នកផ្តល់ជូនសេវាកម្មដល់ពួកគេបានយ៉ាងល្អប្រសើរ ពួកគេនឹងរីករាយចែករំលែកពីអ្នកទៅកាន់មនុស្សផ្សេងទៀតជាមិនខាន៕
0 comments:
Post a Comment