បើនិយាយពីក្រុមហ៊ុនដែលមានតម្លៃថ្លៃជាងគេបំផុតនៅលើពិភពលោកគឺបានធ្លាក់ទៅលើក្រុមហ៊ុន Apple របស់អាមេរិកដែលមានតម្លៃគិតជាទឹកប្រាក់ប្រមាណ ១២៤,២ ពាន់លានដុល្លារគិតមកត្រឹមឆ្នាំ ២០១៤នេះ។
យ៉ាងណាមិញបើបង្វែរអារម្មណ៍ប្រិយមិត្តទៅមើលមហាសេដ្ឋីមានជាងគេបំផុតនៅលើពិភពលោកវិញនោះគឺបានធ្លាក់ទៅលើមហាសេដ្ឋី Carlos Slim Helu ឬ លោក Bill Gates ត្បិតអីទ្រព្យសម្បត្តិរបស់មហាសេដ្ឋីទាំងពីររូបនេះមិនទៀងទាត់នោះឡើយ ពោលគឺតែងតែដណ្តើមតំណែងគ្នាទៅវិញទៅមកក្នុងទឹកប្រាក់ពីចន្លោះ ៧៨ ទៅ ៨២ ពាន់លានដុល្លារនាឆ្នាំ ២០១៤នេះ។
ចុះមហាសេដ្ឋីក្រុមហ៊ុនស្ករគ្រាប់រូបណាមានជាងគេបំផុតនៅលើពិភពលោក? ចម្លើយប្រិយមិត្តប្រហែលជាស្រពិចស្រពិលហើយ។ យ៉ាងណាមិញ TheBNEWS សូមបង្ហាញប្រិយមិត្តថា មហាសេដ្ឋីក្រុមហ៊ុនស្ករគ្រាប់ដែលមានជាងគេបំផុតនៅលើពិភពលោកគឺបានធ្លាក់ទៅលើម្ចាស់ក្រុមហ៊ុនស្ករគ្រាប់ Mars, Inc។
ដោយមានអាយុកាលជាង ១ សតវត្ស ពោលគឺបានបង្កើតឡើងជាលើកដំបូងនៅក្នុងឆ្នាំ ១៩១១ ក្រុមហ៊ុននេះ គឺជាក្រុមហ៊ុនស្ករគ្រាប់ដ៏ល្បីល្បាញបំផុតរបស់របស់អាមេរិកគ្រប់គ្រងដោយក្រុមគ្រួសារត្រកូល Mars ។ បច្ចុប្បន្នទីស្នាក់ការធំរបស់ Mars, Inc មានទីតាំងនៅរដ្ឋ Virginia។
បុគ្គលចំនួន ៣ រូបដែលត្រូវបានគេមើលឃើញថា គឺជាមហាសេដ្ឋីដឹកនាំក្រុមហ៊ុននេះគឺលោក Forrest Mars Jr វ័យ ៨៣ ឆ្នាំ លោកស្រី Jacqueline Mars វ័យ ៧៥ ឆ្នាំ និង លោក John Mars មានវ័យ៧៩ឆ្នាំ។
ការលក់ស្ករគ្រាប់គ្រប់ប្រភេទក្នុងឆ្នាំ២០១៤ បានធ្វើឲ្យក្រុមហ៊ុនខាងលើរកប្រាក់ចំណូលបាន ៣៣ ពាន់លានដុល្លារ។ នេះបានធ្វើឲ្យមហាសេដ្ឋីទាំង ៣ រូបនេះជាប់ចំណាត់ថ្នាក់ជាមហាសេដ្ឋីមានជាងគេបំផុតទី ៣៦ នៅលើពិភពលោក ខណៈដែលទ្រព្យសម្បត្តិម្នាក់ៗរបស់បងប្អូនទាំង៣ នាក់មានចំនួន ១៩,៧ ពាន់លានដុល្លារ។
យ៉ាងណាមិញ បើបូកបញ្ចូលទ្រព្យសម្បត្តិរបស់មហាសេដ្ឋីទាំង៣រូបខាងលើបញ្ចូលគ្នាគេសង្កេតឃើញថា គ្រួសារត្រកូល Mars បានកាន់កាប់ទ្រព្យសម្បត្តិប្រមាណ៥៩,១ ពាន់លានដុល្លារឯណោះ។ មកដល់ពេលនេះ ស្ករគ្រាប់ Mars ដ៏ល្បីល្បាញកំពុងលេចមុខនៅលើទីផ្សារស្ករគ្រាប់ពិភពលោកជាពិសេសនៅលើទឹកដីអាមេរិកតែម្តង៕
0 comments:
Post a Comment